Група американски истражувачи неодамна утврдиле дека енергетските пијалаци имаат повеќе негативни ефекти врз срцевиот ритам отколку кафето и пијалаците кои содржат кофеин. Кога станува збор за енергетските пијалаци, најчестите предупредувања се однесуваат на содржината на кофеин. Меѓутоа, споменатото истражување покажало дека ниту останатите состојки во нив не се безопасни, па дури и дека ги засилуваат ефектите на кофеинот врз срцето.
Во истражувањето учествувале 18 здрави испитаници, кои биле поделени во две групи. Првата група добила задача да испие по две лименки енергетски пијалак, а втората исто количество напиток со кофеин. Кај испитаниците кои испиле енергетски пијалак е забележан побрз срцев ритам отколку кај испитаниците од втората група. Крвниот притисок, исто така, скокнал кај испитаниците од втората група, за после 6 часа да се врати во нормала. Меѓутоа, кај испитаниците кои испиле енергетски пијалак и после 6 часа притисокот и понатаму бил покачен.
Авторите на студијата заклучиле дека енергетските пијалаци делуваат на срцето поинаку отколку оние со кофеин, како и дека личностите со кардиоваскуларни проблеми или хипертензија би требало да ги одбегнуваат енергетските напитоци.
