“Овој научен собир кој овие наредни три дена се одржува во Охрид, претставува особен предизвик за нас како Здружение на урлозите од Македонија, од причина што на едно место се собрани најголемите стручњаци од оваа област на медицината од целиот регион. Учеството на 250 лекари од Словенија, Турција, Албанија, Косово, Србија, Хрватска и Бугарија, и секако од Македонија ќе значи активности и размена на проблеми од урологијата, презентирање на најновите достигнувања во делот на дијагностиката и третманот“, истакна на отворањето претседателот на Здружението на уролози на Македонија, доц. д-р Оливер Станков.
Од особено значење, нагласи тој, е формирањето на балканската асоцијација на уролози на овој конгрес, што на професионален план подразбира научно и професионално здружување во интерес и на пациентите и на лекарите.
Како поддршка на своите колеги со желба за успешни конгресни денови, отворањето на балканскиот конгрес на уролози го поздрави и министерот за здравство, Венко Филипче.
“Доказ за нашата постојана поддршка на урологијата во земјава, е купувањето на роботот Да Винчи, кое наскоро треба да се реализира, и со кое ќе има допрва што да покажаме и да се гордееме. Ваквите стручни собири претставуваат арена на искуства од кои бенефит имаат пред се пациентите, но и ние како лекари. Министерството за здравство минатата година повторно ја активираше како можност кадаверичната трансплантација, што претставува наша огромна поддршка на урлозите. И натаму ние како инситуција ќе стоиме зад развојот на урологијата, на секој расположлив начин“, нагласи министерот Филипче.
Во фокусот на овој Балкански конгрес, се пред се лапароскопските и роботските операции на уролошките проблеми, но и останати теми од овој дел на медицината.
А.Стојановска
