Американскиот центар за контрола и превенција на болести и некои други здравствени установи работат на тоа, но додека насоките не се состават, секој кој е загрижен за своето здравје засега е осуден на тоа сам да се распрашува за своите симптоми и за нив да поразговара со својот лекар.
Имено, симптомите се различни и налик со други болести, па и на лекарите не им е едноставно прецизно да ги дефинираат.
Епидемиолозите според досегашните искуства заклучуваат дека КОВИД-19 може да го зафати речиси секој орган, но не знаат дали симптомите на долг ковид ги предизвикува директно вирусот или тие се последица на стрес и траума што инфекцијата ги носи со себе.
Ова се десет познати начини како на пациентите може да влијае долгиот ковид:
Мозочна магла – секој петти пациент доживеал „магла во главата“ шест месеци откако се опоравил од короната, без оглед дали бил хоспитализиран или не. Ова го покажа мета-анализа на 51 студија за ковид-19. Маглата во глава, како збир на симптоми, различно се манифестира кај секого. Најчесто тоа е комбинација на проблеми со краткотрајна меморија, концентрација или потешкотии при наоѓање зборови за време на разговор.
Замор – Шеесет проценти од хоспитализираните пациенти чувствуваат замор во мускулите и слабост и шест месеци по короната, открива обемна кинеска студија. И гореспоменатата магла во главата и заморот се одлики на синдром на хроничен замор.
Проблеми со спиењето – еден од петти пациент има проблеми со спиењето шест месеци по болеста, покажала мета-анализата на 51 студија.
Отежнато дишење и постојана кашлица – ова се вообичаени симптоми кои се јавуваат од еден месец до половина година по прележаниот КОВИД-19, покажала студија спроведена на 73 илјади американски воени ветерани.
Срцеви проблеми – срцебиење и аритмија исто така се вообичаени симптоми шест месеци по короната, покажала истата студија. Таквите пациенти воедно имаат и зголемен ризик од развој на срцеви заболувања, миокардитис, атеросклероза и згрутчување на крвта шест месеци по болеста.
Невролошки симптоми – од нив страда една третина од пациентите кои имаат проблем со долг КОВИД-19. Во нив спаѓаат и нарушувања на расположението, како што се вознемиреност и депресија.
Губење на мирисот – кај околу една третина од оние кои за време на болеста го изгуниле осетот за мирис, тој не се вратил два или повеќе месеци, открило американско истражување.
Дигестивни проблеми – според една кинеска студија, повеќе од 40 проценти од хоспитализираните пациенти, три месеци по примарната инфекција, чувствувале проблеми со губење на апетитот, гадење, мачнини, желудочен рефлукс и пролив.
Притисок во градите и болки во зглобовите – ова е најчестиот проблем бидејќи се јавува кај 90 проценти од луѓето кои страдаат од долг ковид, покажа голема студија од декември, минатата година. Кај дел од пациентите, симптомите траеле и до седум месеци.
Дијабетес и болести на бубрезите – според студија спроведена на воени ветерани во САД, долгиот ковид носи 39% поголем ризик од развој на дијабетес во текот на шест месеци по инфекцијата. Исто така, постои зголемен ризик од развој на акутни болести на бубрезите.
Други симптоми – пациенти кои страдаат од долг ковид пријавиле и други симптоми кои научниците сè уште не ги потврдиле во поголемите студии, како што се значително опаѓање на косата, осип на кожата, неправилна и болна менструација или тинитус (зуење во ушите).
