Дури 40 отсто од случаите на карцином и исто толку кобни случаи од последиците од оваа болест би можеле да се одбегнат кога би се применила соодветна превентивна стратегија, покажале резултатите од истражувањето на американските научници објавени во медицинскиот магазин „CA: A Cancer Journal for Clinicians“.
Околу 42 отсто од сите случаи на рак и 45,1 отсто од кобните исходи од оваа болест би можеле да се спречат, тврдат авторите на студијата втемелена на податоци од 2014 година, која е спроведена во САД. Најмногу болни, но и кобни случаи од карцином се поврзани со пушењето: станува збор за 19 отсто од случаите.
Дебелината е на второ место, далеку зад пушењето, но сепак со 7,8 отсто резултира со развој на карцином, а процентот на кобни случаи е 6,5. На трето место е алкохолизмот кој влијае на развојот на рак во 56 отсто од случаите и за последица има кобен исход во 4 отсто од случаите.
На четврто место е претераното изложување на ултравиолетови зраци, влијае на развојот на рак во 4,7 проценти од случаите. Следува физичката неактивност која со развој на рак резултира во 2,9 отсто од случаите. Заради недоволна консумација на овошје и зеленчук рак може да се развие кај 1,9 проценти од луѓето, а резултира со кобни последици во 2,7 отсто од случаите, додека инфекцијата со папилома вирусот резултира со развој на рак во 1,8 проценти од случаите.
Ракот на бели дробови е најчест вид рак, а во 81,7 проценти од случаите причина е пушењето. Тоа се поврзува со 73,8 отсто од случаите на рак на гркланот, 50 отсто од случаите на рак на хранопроводот и 46,9 отсто од случаите на рак на бешиката.
