Професорката Камила Хоторн, шеф на катедрата за семејната медицина на Кралскиот колеџ, вели дека матичните лекари оваа зима забележале дека респираторните инфекции траат подолго оваа година и пациентите потешко се опоравуваат, но додава дека повеќето закрепнале без никакви последици или потреба од медицинска интервенција.
Таа истакнува дека карантините за време на пандемијата можеби ја намалиле отпорноста на јавноста на инфекции, но признава дека не е сосема јасно зошто кашлицата и настинката се задржуваат толку долго и зошто на луѓето им треба толку долго време за да се опорават.
Истражувањата покажуваат дека стапките на инфекции на респираторниот тракт се далеку над просекот, што го потврдуваат и неделните податоци на Британската здравствена агенција за грип и други болести. Овој месец, возрасните кои не мора нужно да излегуваат, беа предупредени да останат дома за да се намали ширењето на инфекциите.
“Не е сосема јасно зошто некои инфекции траат подолго од вообичаеното. Ова го забележаа и лекарите и пациентите. Поголемиот дел од јавноста беше изолиран во последните две зими и тоа очигледно ја намали отпорноста на инфекции. Затоа, во некои случаи, сигурно дошло до тоа да луѓето се заразат со една инфекција, а потоа веднаш и со друга. А со оглед дека се работи за различни инфекции, преболувањето на едната не значи дека сте имуни на другата“, објаснува проф. д-р Хоторн.
Таа вели дека на пациентите им се советува помалку да излегуваат во текот на зимата и генерално да внимаваат на хигиената.
Проф. Хоторн го препорачува вообичаениот парацетамол за намалување на висока температура, болки во грлото или уво, внимавајте да не ви е ладно, одморајте доволно и да пијте доволно течности.
Нагласува уште еднаш дека антибиотиците немаат ефект на вирусните инфекции, туку само на бактериските, а повеќето инфекции на респираторниот тракт се вирусни. Затоа, ако кашлицата трае подолго, се влошува со отежнато дишење или ако почувствувате болка во градите или слабеење за краток временски период, побарајте совет од лекар.
