Подигање на свеста за важноста на превенцијата од мозочен удар, препознавање на симптомите и навремен почеток на лекувањето, според експертите, е клучната работа во насока на постигнување на најдобар можен квалитет на живот, по мозочниот удар.
Според моменталните податоци, 80 милиони луѓе во светот преживеале мозочен удар, додека 50 милиони преживеани живеат со некоја форма на траен инвалидетет.
Мозочниот удар е меѓу најчестите причини за смрт, може да се случи неочекувано и не бира возраст. Во 85% од случаевите, предизвикан е од запушување на крвните садови со згрутчување. Тогаш оштетувањето на мозокот и инвалидитетот може да се намалат/спречат со лекови или со механичко отстранување на згрутчувањето.
Важно е да се препознаат симптоми на мозочниот удар, и што поитно да се јавите кај лекар, за да навреме се превземат соодветните дијагностички и тераписки мерки. Со навремено почеток на лекување (што побрзо, во рок од три часа), таквата состојба може да се излекува.
НАЈЧЕСТИ СИМПТОМИ НА МОЗОЧЕН УДАР СЕ:
- Изненадно трнење, слабост или одземеност на рацете, нозете или лицето: особено зафатеност на само една страна на телото.
- Изненадни пречки во говорот: отежнато изговарање, разбирање или губење на говорот.
- Изненадни пречки во видот: замаглување или губење на видот.
- Изненадни пречки во одот, вртоглавица, губење на рамнотежа
- Изненадна силна главоболка која може да биде проследена со мачнини и повраќање.
