Пушењето, камењата во бубрези, хроничното воспаление на бубрезите и изложеноста на одредени хемиски супстанци придонесуваат за развој на рак на бубрезите. Поради зголемената употреба на ултразвук, тој се повеќе се открива како случаен наод при абдоминален преглед. Кај туморите кои не се прошириле во околината, хируршкото отстранување нуди шанса за излекување. Постоперативната примена на имунотерапијата и, во поново време, таргетираните или целни биолошки лекови донесе позитивни промени во преживувањето кај пациентите кај кои радикална операција поради проширеност на болеста не е можна.
Постојат неколку типови на рак на бубрезите. Ракот на бубрежните клетки (аденокарцином) е најчест и чини 85% од сите дијагностицирани случаи на рак на бубрезите. Значително поретки се бубрежниот сарком и Вилмсов тумор, кои често се дијагностицираат во детството.
АНАТОМИЈА НА БУБРЕЗИТЕ
Бубрезите се парни органи со овална форма, сместени во задниот дел на абдоминалниот ѕид, во висина на горните лумбални пршлени. Десниот бубрег обично лежи малку пониско во споредба со левиот, поради тоа што црниот дроб се наоѓа над него. Бубрезите имаат црвено-кафеава боја, кај возрасно лице имаат должина од околу 10 сантиметри и се со големина на тупаница.
Главната улога на бубрезите е да ја филтрираат крвта, со што од организмот се отстрануваат штетните продукти од метаболизмот, токсините, лековите, вишокот сол и течности. Крвта за филтрација се носи до бубрегот преку бубрежната артерија, додека прочистената крв од бубрегот ја носат бубрежните вени. Од вишокот вода и штетни материи во бубрезите се формира урината. Урината што се формира во бубрежните каналчиња се акумулира и оттаму преку уретерот се цеди до мочниот меур и потоа се излачува надвор од телото.
Покрај излачувањето на штетни материи и вишок вода од организмот преку урината, бубрегот има неколку дополнителни функции:
- регулирање на киселоста на телесните течности (ацидобазна рамнотежа)
- лачење на хормони (еритропоетин, ренин, простагландини).
КАКО ДА ГО ОТКРИЕТЕ РАКОТ НА БУБРЕЗИ
Ракот на бубрези на почетокот не дава никакви симптоми, па во тој стадиум се открива случајно, во рамките на систематски преглед или при преглед поради некои други тегоби.
Три симптоми кои се појавуваат истовремено:
- Болка во долниот дел од грбот (делот помеѓу долните ребра и карлицата)
- Крв во урината (хематурија)
- Маса која може да се напипа во слабинскиот дел или долниот дел од грбот, во медицината се опишуваат како типичен знак на рак на бубрези.
Меѓутоа, таквата комбинација на симптоми се појавува кај 10 проценти од болните. Од општите симптоми, најчесто се јавуваат:
- Губење на телесна маса
- Замор
- Покачена телесна температура
- Исцрпеност
- Анемија
Ракот на бубрези може да се презентира и со низа симптоми кои, без внимателна обработка, тешко е да се поврзуваат со бубрегот. Тоа може да бидат лабораториски промени како што се еритроцитоза, хиперкалцемија, хипогликемија или продолжено протромбинско време. Хипертензијата понекогаш може да се појави како прв знак за рак на бубрезите.
