ПАНДЕМИЈА СО КОВИД-19: СЗО ја предупреди Европа на сериозен бран на коронавирусот кој хара

Вчеравечер, регионалниот директор на СЗО, Ханс Клуге изјави дека само минатата недела пријавени се 300.000 нови инфекции.

Последните бројки на неделни случаи на новиот коронавирус во Европа ги надминаа резултатите забележани кога пандемијата прв пат го достигна својот пик во март, објави Светската здрвствена организација.

Вчеравечер, регионалниот директор на СЗО, Ханс Клуге изјави дека само минатата недела пријавени се 300.000 нови инфекции.

“Пред нас е многу сериозна ситуација. Некои европски земји, како Велика Британија и Франција, евидентираат највисоки дневни бројки во последните неколку месеци“, рече Клуге.

Капацитетите за тестирања се зголемени низ цела Европа од почетокот на пандемијата, што значи дека веројатно ќе биде поголем и бројот на заразени. Клуге додава дека новите бројки покажале и “алармантни стапки на пренос на заразата во регионот“.

Бројот на примени пациенти во болница, како и смртните случаи се уште не бележи сличен пораст, иако Шпанија и Франција бележат тренд на раст. Иако младите лица – за кои е помала веројатноста дека сериозно ќе се разболат ако се заразени – во моментов чинат најголем процент од ново евидентираните случаи на коронавирус, постои страв од многу поголем број на случаи на сериозна клиничка слика на болеста, доколку вирусот се прошири меѓу повозрасните и ранливите групи.

Клуге на вчерашниот брифинг изјави и дека мерките на затворање/карантин дале јасни резултати. “Во јуни случаевите го достигнаа најниското ниво. Но, бројот на случаи во септември треба на сите да ни послужат како знак за аларм“, додаде тој.

Претходно, Клуге предупреди дека Европа треба да се подготви за пораст на бројот на смртни случаи од коронавирусот во октомври и ноември, предупредувајќи дека “ќе биде се потешко“.