Миење уши: Кога е потребно и како се изведува?

Постапката е брза, безболна и едноставна и не бара никаква посебна подготовка

Миење на увото односно иригација е процедура за чистење на ушниот канал со топла вода. Се изведува кога каналот е запушен со ушна маст (церумен). Церуменот го штити увото од бучава, инсекти и бактерии и габи што можат да предизвикаат воспаление на ушите. Улогата на церуменот во одржување на здравјето на увото е од исклучително значење.

Меѓутоа, понекогаш може да дојде до преголемо таложење на церуменот, предизвикувајќи запушување на увото и непријатни симптоми како што се чешање, болка, зуење и ослабен слух.

Кога е неопходно да се измие увото

Човечкото уво има природен механизам за чистење, кој за време на џвакањето или зборувањето полека се отстранува од каналот во ушната школка, од каде е лесно да се избрише.

За жал, многу луѓе при употреба на стапчиња за уши не го чистат церуменот, туку само го притискаат подлабоко во внатрешноста. Токму ваквите обиди за чистење на ушите обично се причина за запушување и воспаление на увото

Во вакви случаи е неопходно да се измие увото. Миењето секогаш треба да се изведува во медицински установи под медицински надзор, бидејќи домашните обиди за миење на увото обично го влошуваат проблемот.

Како изгледа миењето на увото?

Пред миењето, лекарот со посебен инструмент ќе ја прегледа внатрешноста на ушниот канал за да утврди дали е потребно да се мие. Миењето обично се врши од страна на медицинска сестра со топла вода или со благо-кисел раствор. Течноста со шприц се вбризгува под притисок во ушниот канал и создава мал вртлог во внатрешниот дел на увото, со што се разложуваат наталожените наслаги од церумен на поситни делови. Остатоците од церумен потоа излегуваат во ушната школка од каде што се отстрануваат. Постапката е брза, безболна и едноставна и не бара никаква посебна подготовка.

Несакани ефекти

Несаканите ефекти се чести, но обично безопасни. Непријатните последици од испирање на увото може да бидат следниве:

  • блага вртоглавица,
  • чувство на болка или непријатност во ушниот канал,
  • тинитус или зуење во ушите.

Несаканите ефекти обично поминуваат до крајот на денот, и ако болката се зголемува или трае подолго од еден ден, треба да се консултира лекар.