Клиничката слика на акутното воспаление на белите дробови е варијабилна и може да вклучува брз развој на знаци на тешка, потенцијално смртоносна болест проследена со бројни компликации, па затоа брзата и рационална одлука за изборот на лекување е нужна при првата средба со пациентот. Пневмонијата е здравствена состојба која индицира итен третман бидејќи може да има фатални последници особено кај помладата популација.
Воспалението на белите дробови е водечка причина за смртност кај деца до петгодишна возраст.
ПРИЧИНИ
Иако се познати над стотина потенцијални причинители за вонболничките пневмонии (бактерии, вируси, габи и паразити), голем број од пневмониите се предизвикани од еден од само неколку микроорганизми. Streptococcus pneumoniae е, секако, најчестиот изолиран типичен патоген и од него се предизвикани повеќе од 80 % од вонболничките пневмонии. Меѓу останатите најчести се Haemophilus influenzae, Moraxella catarrhalis – причини на кои треба да се мисли кај болни со хронична опструктивна белодробна болест, а кај пациенти со придружни болести или оние кои живеат во стационари, почести се инфекции предизвикани од грам-негативни бацили (Klebsiella pneumoniae, Escherichia coli…)
СИМПТОМИ
Типичната пневмонија почнува ненадејно со треска и студ проследени со нагло зголемување на телесната температура, болка во градите при длабоко вдишување, искашлување на секрет, општи знаци и симптоми на болеста, високи леукоцити и висока акутна фаза на воспаление.
Од друга страна, атипичното воспаление на белите дробови најчесто се развива со доминација на општите симптоми, благ фебрилитет и суво, често исцрпувачко надразнето кашлање.
