Фондацијата „Трајче Мукаетов“ и годинава, по 11. пат ќе додели 40 нови стипендии за 12 студенти на Фармацевтскиот и 28 студенти на Медицинскиот факултет при Универзитетот “Св. Кирил ии Методиј“ Скопје. Истовремено, беа доделени и еднократни парични награди на првенците на генерација на овие два факултета и тоа за Филип Илиевски од Фармацевтскиот факултет со просек 9,78 и Марија Тодоровска од Медицинскиот факултет со просек 9,83, кои се и досегашни стипендисти на Фондацијата.
„ Како компанија, особено сме горди што во изминативе 11 години имаме вложено над 1,35 милиони евра во стипендирање идни лекари и фармацевти; за 9 години дониравме над 24.000 евра за награди на првенците на генерациите на Медицинскиот и Фармацевтскиот Факултет при УКИМ а преку хуманитарните настани организирани под закрила на Фондацијата во изминативе 8 години дониравме околу 115.000 евра“ – изјави Живко Мукаетов, Претседател на фондацијата „Трајче Мукаетов“ и генерален директор на компанијата „Алкалоид АД Скопје“.
Фондацијата досега има стипендирано вкупно 458 студенти по фармација и медицина, вклучувајќи ги и новите 40 во учебната 2018/2019. Стипендијата изнесува 6.500 денари во текот на 12 месеци.
А.Стојановска
