Под влијание на хормоните: Мажите се понежни кога ќе станат татковци

По пристигнувањето на бебето нивото на тестостерон значително се намалува кај мажите, што им овозможува да бидат понежни и повнимателни татковци

Иако мајката носи поголем „хормонален“ товар за време на бременоста и по породувањето, ниту татковците не се исклучени! Имено, една студија покажала дека по породувањето на жената кај мажите опаѓа нивото на тестостерон, што ги прави понежни и повнимателни татковци.

Тестостеронот е хормон кој ја поттикнува машката сексуалност, агресивност и физичка сила, а неговото ниво е највисоко кај младите и неженетите мажи без деца, велат научниците. Меѓутоа, кога ќе им се роди дете, се се менува, па татковците на некој начин стануваат поинакви личности, односно стануваат „помеки“ спрема своите наследници.

Кога ќе се роди дете, се се менува, па и мажите

Мајките, од друга страна, се грижливи бидејќи во нивното тело се зголемува нивото на хормонот окситоцин, кој е „одговорен“ за заштитничкото однесување кон децата. Во истражувањето на научниците од Универзитетот Лозана се наведува дека доилките имаат зголемено ниво на хормонот окситоцин поради лактацијата и дека тоа трае се додека дојат. Овој хормон се ослободува во мозокот и кога некој ќе почувствува страв и му помага на лицето да остане во состојба на зголемена внимателност.