ПОДМОЛНИ И СКРИЕНИ ЗНАЦИ: Пет симптоми кои може да бидат рани знаци на дијабетес

Многу луѓе кои развиваат дијабетес тип 2 не знаат дека се болни додека крвната анализа не покаже покачено ниво на шеќерот во крвта или додека болеста не напредува да почне да се развиваат сериозни компликации.

“Дијабетесот е тивок и подмолен. Во повеќето случаи луѓето немаат рано симптоми“, вели Роналд Тамлер, директор на Клиничкиот институт за дијабетес Mount Sinai.

Во некои случаи постојат и подмолни знаци. Некои рани симптоми на дијабетес се добро познати: постојана жед, интензивно мокрење или нагло зголемување или намалување на телесната тежина. Останатите е лесно да се игнорираат, а во продолжение ви откриваме кои се тие.

  • Воспалени или инфицирани непца

Пародонтот, познат и како болест на непцата, може да биде ран знак за дијабетес тип 2, според ново истражување објавено во списанието BMJ Open Diabetes Research & Care. Студијата покажала дека лицата со болести на непцата, особено оние со тешки случаи, имаат повисока стапка на дијабетес (и дијагностицирани и недијагностицирани), како и преддијабетес.

Врската помеѓу болестите на непцата и дијабетесот не е нова, вели д-р Тамлер.

“Воспалението предизвикано од болестите на непцата се заснова на истите фактори кои се одговорни за висок шеќер во крвта и предизвикуваат дијабетес“, додава тој.

  • Промена на бојата на кожата

“Пред да добиете дијабетес, може да забележите темна промена (дисколорација) на бојата на кожата на задниот страна на вратот“, тврди д-р Тамлер.

Обично тоа е знак за инсулинска резистенција, губење на чувствителноста на хормонот што телото го користи за регулирање на глукозата, што на крајот може да доведе до целосен дијабетес.

Промената на бојата на кожата во ретки случаи може да биде предизвикана од цисти на јајниците, хормонални нарушувања, нарушувања на тироидната жлезда или рак. Одредени лекови и суплементи, вклучително и орална контрацепција и кортикостероиди, исто така може да доведат до ваква промена.

  • Чудно чувство во нозете

Околу 10 до 20 проценти од лицата на кои им е дијагностициран дијабетес, веќе имаат некакви оштетувања на нервите поврзани со болеста. Во раните фази тоа може да биде едвај забележително. На пример, појаснува д-р Тамлер, може да чувствувате трнење во нозете или намален осет и рамнотежа.

  • Губење на слухот или видот

Зголеменото ниво на шеќер во крвта може да ја оштети мрежницата и да предизвика флуктуирање на нивото на течност околу очното јаболко, што резултира со заматен или ослабен вид. Кога нивото на шеќерот во крвта ќе се нормализира, видот обично се враќа, но ако дијабетесот не се лекува предолго, оштетувањето може да стане трајно.

Исто така, високиот шеќер во крвта може да влијае и на нервните клетки во увото и да предизвика оштетување на слухот.

“Тоа е нешто за што малку луѓе зборуваат, но искусните аудиолози знаат да ја побараат и откријат поврзаноста“, вели д-р Тамлер.

  • Долги дремки  

Во минатогодишниот здравствен преглед на болести и состојби, е наведено дека лицата кои дневно дремеле подолго од еден час имале за 45 отсто поголема веројатност дека ќе развојат дијабетес тип 2 во споредба со оние чија дремка била покуса или воопшто не дремеле.

Научниците потенцираат дека дремењето во текот на денот не предизвикува дијабетес. Но, истакнуваат дека тоа може да биде предупредувачки знак за основниот проблем како што е недостаток на сон, депресија или апнеа за време на спиење, односно сите состојби поврзани со зголемен ризик од дијабетес.