“Во Израел е идентификувана варијантата AY 4.2, која е откриена во повеќе европски земји“, соопшти вчера вечер израелското министерство за здравство.
Единаесет годишно дете од Европа било носител на оваа подваријанта. Идентификувано е на аеродромот во Тел Авив и е сместено во карантин, наведува министерството, додавајќи дека од тогаш не е потврден ниту еден друг случај.
Директорот на Институтот за генетика во Лондон, Франсоа Балу изјави дека новата варијанта се уште е ретка и дека најверојатно не е позаразна од останатите.
Над 60 проценти од девет милиони Израелци примиле две дози вакцина, а повеќе од една третина и трета доза.
Во Британија пак расте бројот на случаи на инфекции со подваријантата на делта сојот на коронавирусот, но не е веројатно дека тоа ќе ја промени целокупната слика на КОВИД-19, изјави денес Ендру Полард, шеф на Оксфордската група за вакцини.
Подваријантата AY 4.2 чини околу 6 проценти од секвенцираните примероци, објави минатата недела британската Агенција за здравствена безбедност, но не е под истрага и не е означена како варијанта која предизвикува загриженост.
“Откривањето на нови варијанти е важно да се следи, но тоа не значи дека новата варијанта ќе биде следната што ќе ја замени делта варијантата“, изјави Полард за Би-Би-Си.
“Дури и да биде така, делта сојот неверојатно добро се пренесува меѓу невакцинираното население, а новата би можела и уште подобро, но тоа веројатно нема драматично да ја промени сликата во однос на сегашната“, додава тој.
