Пореметувањата на сонот се врзани со користење мобилни уреди пред спиење

Синото светло од екраните на паметните телефони може да го поремети сонот и да доведе до анксиозност или депресија

Една од модерните болести на денешнината е пореметувањето на сонот, која трауматизира стотици илјади луѓе насекаде во светот. Според последните истражувања, научниците откриваат врска меѓу зависноста од користењето на социјалните медиуми и дигиталните уреди непосредно пред спиење и ненаспаноста. Лежењето в кревет навечер со телефонот или со таблетот в рака и користењето на Instagram, Snapchat, Facebook или Twitter може да се поврзе со развојот на некои ментални пореметувања како депресија, пишуваат британските медиуми.

Според податоците на британскиот Државен завод за здравство, во последните шест години бројот на хоспитализирани деца со нарушување на сонот значително пораснал.

„Сите знаеме дека синото светло од екраните на паметните телефони може да го поремети сонот, но мислам дека по бројни предупредувања, во овој случај за незаспаното дете е одговорен родителот“, вели експертот за дигитална детоксикација Тања Гудин, авторка на книгата „Stop Staring at Screens”.

Според Мајкл Фаркар,експерт за медицина на спиење и сон во лондонската детска болница „Евелина“ дебелината и менталните пореметувања се директно поврзани со пореметувањето на сонот. Иако порано се верувало дека ненаспаноста е последица на гојазноста, последните години има се повеќе докази дека всушност неспиењето влијае на таложењето килограми.

„Кога детето е недоволно наспано, организмот реагира со хормонален дисбаланс, кој може да влијае на апетитот и на чувството за глад. Значи кога децата се уморни и ненаспани, посегнуваа по нездрава храна“ вели Фаркар и додава дека неспиењето предизвикува анксиозност. На децата од најрана возраст им е потребна рутина за повеќе работи со постепено намалување на активноста пред крајот на денот, при што треба да се намали и употребата на паметните телефони, особено пред одење на спиење.