Водата му е потребна на организмот за нормално да функционира, но понекогаш може да се случи да дојде и до преголемо задржување на течности што физички се манифестира со отекување. Постојат повеќе причини зошто се задржува вода во организмот, еве некои од нив:
Исхраната која подразбира внесување големи количества сол и преработена храна доведува до покачување на килограмите, но и задржување на вишок течности. Поради тоа би требало да го ограничите консумирањето сол и на сметка на тоа да се обидете да експериментирате со други зачини и нови вкусови.
Во периодот на менопауза и пред оваа животна фаза многу жени страдаат од задржување на вишок вода во организмот и отекувањето кое се јавува како последица. Хормоните естроген и прогестерон имаат важна улога во тоа, па задржувањето течности може да биде предизвикано поради високо ниво на естроген или ниско ниво на прогестерон во крвта.
Ако поголемиот дел од времето го поминувате во седење или стоење, ткивата може да почнат да задржуваат вода, затоа преземете мерки. Ако не сте физички активни, доволно е да внесете мала промена и, на пример, да почнете да пешачите.
Кардиоваскуларните нарушувања може да бидат причина за задржување вода и отекување во пределот на абдоменот и нозете. Ако забележите отоци на овие делови од телото, не е лошо да направите контрола на срцето и крвните садови.
Одредени лекови, како на пример, антидепресивите, бета-блокаторите, медикаментите за регулирање крвен притисок, оние што се користат во хемотерапијата, како и нестероидните антиинфламаторни лекови можат да предизвикаат задржување течности во организмот.
КАКО ДА СИ ПОМОГНЕТЕ:
Магнезиум – овој минерал поттикнува ослободување на вишокот течности. Студиите покажале дека 200 милиграми магнезиум дневно во деновите пред менструација значително го намалуваат задржувањето вода – инаку еден од симптомите на ПМС. Магнезиумот го има во темнозелениот лисест зеленчук, јаткастите плодови, житарките од цело зрно, црната чоколада…
Витамин Б6 – еден од витамините коишто се важни за формирање црвени крвни зрнца, но и за некои други витални функции. Покрај тоа, витаминот Б6 го ублажува задржувањето вода во текот на ПМС. Намирници коишто се богати со овој витамин се банани, ореви, компир и месо.
Калиум – еден од важните минерали, а истражувањата покажале дека проблемот со задржувањето вода се решава со оптимално ниво на калиум во крвта. Овој минерал го снижува нивото на натриум и поттикнува создавање урина. Намирниците богати со калиум се домат, авокадо и банана.
