Породувањето со себе носи вистинска ерупција од емоции, а чувствата често се менуваат од еуфорија и радост, до анксиозност и сомнежи. Мајките доживуваат бура од емоции, а кај некои се јавува чувство на вина што не се постојано радосни затоа што донеле на свет потполно здраво дете. Ваквите чувства се појавуваат неколку дена по породувањето и можат да траат и до две недели. Доколку ваквата состојба се влоши и трае со месеци, тогаш станува збор за постпородилна депресија.
Симптоми на постпородилната депресија
Се работи за компликација која настанува после породувањето, а како што би се третирала секоја физичка компликација по породувањето, треба да се обрне внимание и на менталната состојба на родилката. Стручната помош е од исклучителна важност за да се одбегнат евентуални компликации, но и за мајката да може да се поврзе со новороденчето.
- Депресивно расположение или чести промени во расположението;
- Потешкотии при остварувањето конекција со новороденчето;
- Оддалечување од семејството и пријателите;
- Губење апетит или зголемен апетит;
- Несоница или голема желба за спиење;
- Замор и недостаток на енергија;
- Незаинтересираност за активности во кои претходно мајката уживала;
- Зголемена раздразливост и интензивен гнев;
- Чувства на беспомошност, безвредност, срам или вина;
- Тешкотии во концентрирањето, размислувањето и донесувањето одлуки;
- Немир;
- Анксиозност и панични напади;
- Мисли за самоповредување или нанесување повреди на бебето;
- Повремено размислување за смрт или самоубиство;
Првите симптоми најчесто се појавуваат неколку недели по породувањето, но можат да се појават и порано – за време на бременоста или подоцна – до првата година на детето. Елементарно е што поскоро да се побара стручна помош!
Како причина за постпородилната депресија се сметаат физичките промени и емоционалните проблеми. Голема улога игра и тоа што по породувањето доаѓа до нагло опаѓање на нивото на хормони во телото. Тука е и недостатокот на сон и преморот, а во такви ситуации тешко можете да се справите дури и со најмалите проблеми. По породувањето жената може да се чувствува и помалку привлечна, да има чувство дека ја губи контролата над својот живот и идентитет…
Совет: Доколку чувствувате кој било од овие симптоми, а интензитетот со текот на времето не се намалува, задолжително консултирајте се со доктор.
