Лицата со веќе постоечки болести, како срцевите, изложени се на поголем ризик од развој на тешки симптоми ако се заразат со коронавирус, поради што е особено важно да се придржуваат на сите препорачни мерки на заштита. Најважни се одржувањето на физичко растојание и зачестено миење на рацете, но уште неколку работи треба да ги имаат предвид.
Респираторната болест КОВИД-19 што ја предизвикува коронавирусот, претставува големо оптоварување за срцевиот мускул, дури и ако патоген не го нападне директно овој орган, предупредуваат германските кардиолози.
Потешката форма на болеста може да резултира со воспаление на белите дробови, што може да го намали нивото на кислород во крвта. Ако инфекцијата истовремено предизвикува и пад на крвниот притисок, тој орган мора да ја забрза работата за да ја надомести, што претставува големо оптоварување, особено за веќе болното срце.
Поради сето ова, срцевите болни треба да водат сметка за тоа нивното срце да биде што посилно и поотпорно. Кардиолозите советуваат совесно и редовно да земаат лекови кои претходно им биле препишани. Истовремено, треба да водат сметка и за здравата исхрана, како и редовната физичка активност прилагодена на нивната состојба.
Сфатете ги сериозно потенцијалните симптоми како: повремен краток здив, кој иако се јавува кај многумина срцеви болни, исто така може да биде знак и за КОВИД-19.
И потешкотиите со дишењето кои се влошуваат, не смеат да се сфатат несериозно. Посоветувајте се со вашиот лекар, апелираат германските кардиолози, бидејќи ова може да биде знак за КОВИД-19, а не за вашиот “стар“ проблем со срцето.
Германските лекари сметаат дека пациентите со срцеви проблеми не треба да ги откажуваат планираните посети на кардиолог.
