Прегледи што секој маж треба да ги направи еднаш годишно

Со редовните систематски и превентивни прегледи можете да спречите некои од најопасните болести, а познато е дека жените се поодговорни кон своето здравје и дека почесто одат на превентивни прегледи

Систематскиот преглед подразбира прегледи од повеќе специјалисти кои можат да откријат во каква состојба ви е здравјето и дали постои опасност од некои смртоносни болести, со цел навреме да се препише соодветна терапија.

Рано откриените болести можат да се излекуваат во најголем број од случаите, но само ако се откриени навреме и во почетна фаза. Систематскиот преглед кај мажите опфаќа преглед од уролог и уролошки ултразвук, потоа лабораториска анализа, објективен преглед на срцето, белите дроброви, мерење на крвниот притисок, проверка на состојбата на периферните крвни садови, детална анамнеза, мерење на обемот на половината и одердување БМИ, индекс на телесна тежина…

Се советува секој маж еднаш годишно да направи и ултразвук на абдоменот, карлицата и интернистички преглед со ЕКГ.

Ултразвучниот преглед на абдоменот и малата карлица е безболен, неинвазивен преглед на црниот дроб, жолчното ќесе и патишта, двата бубрега, слезината, бешиката, простата, лимфните жлезди, стомачната течност, големите крвни садови во овој дел од телото. Овој преглед се изведува кај личностите кои имаат и тегоби во стомакот и како дијагностичка процедура која претходи на прегледот на желудникот, дванаесетпалечното, тенкото и дебелото црево со сонди или рендгенолошки. Прегледот овозможува да се види како изгледаат органите, да се измери нивната големина, да се процени градбата и структурата, и дали во органите во стомакот има евентуална патолошка содржина.

Кардиолошкиот преглед е, исто така, безболен, не е потребна никаква подоготовка, не се користат инвазивни инструменти. Трае просечно околу 20-30 минути.

И уролошкиот ултразвучен преглед е, исто така, безболен и неинвазивен дијагностички метод со кој се врши преглед на бубрезите, бешиката, надбубрежните жлезди и простата и тестисите. Неопходно е да се направи ако имате тегоби врзани за мокрењето, појавата на крв во урината, кај камења во мочните канали, кај мажите кои забележале израстоци на тестисите, како и кај оние кои немаат тегоби, но имаат повеќе од 50 години заради рано дијагностицирање на бенигна хипертензија на простата.