Пишува: Прим. д-р Лидија Бисеркоска-Атанасовска
дерматовенеролог
Се вцрвувате и при најмал срам, имате акни иако одамна ви поминал пубертетот или ви се истакнуваат капиларите на кожата. Ова се само неколку симптоми по кои лекарите ќе се посомневаат дека имате розацеа.
Од неа може да бидат зафатени и очите, ушите, градите и грбот. Може да се појават ситни крвни садови околу вцрвенетите делови од кожата, на која веќе има и мали мозолчиња. За разлика од случаите на акни, кога се работи за розацеа на кожата, нема комедони – црнки.
Сите ги немаат сите симптоми, а проширените мали крвни садови може да се резултат и на долготрајна изложеност на сонце, а не на розацеата. Сепак, ако кожата не ја враќа нормалната боја, а промените се видливи, одете кај дерматолог.
КОГА СЕ ПОЈАВУВА БОЛЕСТА?
Мали црвени мозолчиња, од кои некои со гној, се појавуваат на лицето придружени со црвенило и видливи тенки крвни садови на површината на кожата. Во потешки случаи се развива и ринофима, кога лојните жлезди се зголемуваат и прават оток и црвенило на долната половина од носот до образите.
Ринофимата најчесто се јавува кај мажи. Околу 50 проценти од луѓето со розацеа имаат печење и чешање на очите. Тоа е конјуктивитис, кој може да направи компликации на видот .
Розацеата најчесто се појавува кај возрасни од двата пола, на возраст од 30 до 50 години, кои имаат светла кожа. Понекогаш болеста е почеста во менопауза, па жените често се жалат на голема чувствителност на козметички препарати. Заболените од розацеа треба да избегнуваат топли пијалаци, зачинета храна, кофеин, алкохол и долга изложеност на сонце. Престојот на сонце мора да се ограничи, да се носи капа и на секои два часа да се мачкаат кремови со заштитен фактор над 15. Треба да се избегнуваат и екстремно ниски температури и што почесто да се биде на чист воздух.
ПОСЕБНА ТЕРАПИЈА ЗА СЕКОЈ ПАЦИЕНТ
Лицето не смее да се чеша, трие или масира ниту, пак, да се користат козметика и продукти за лице со алкохол. Пациентот треба да води дневник дали црвенилото се појавило од храна, активности, лекови. Препорака е комбинација на третмани за секој пациент посебно. Подобрување кај нив се забележува по три-четири недели терапија, а поголем ефект има по два месеци.
