Покачената температура може да биде непријатна, вознемирувачка, па дури и помалку застрашувачка, особено во последниве месеци. Иако, многу веројатно сте имале покачена температура во некој момент во животот, можеби не ви е баш јасно што предизвикува висока температура.
Висока температура која не се намалува е причина да се обратите кај вашиот лекар барем со телефонски повик, но е добро да имате и претстава што во тој момент се случува со вашето тело. Па, еве што предизвикува зголемена температура и како да се однесувате кон неа.
Во основа, покачена температура е телесна температура повисока од вообичаената. Ако е малку повисока, зборуваме за зголемена температура, а за висока температура (треска) технички се зборува дури кога телесната температура е над 38 степени. Здравствената фела за нормалната телесна температура води вечна расправа, но општо се смета дека тоа е 37 степени.
ШТО СЕ СЛУЧУВА ВО ТЕЛОТО КОГА ИМАМЕ ВИСОКА ТЕМПЕРАТУРА?
Треската вообичаено е знак дека телото се обидува да се бори против болести или инфекции. Иако ситуацијата може да се искомплицира, општо таа е знак дека имуниот систем се бори против нешто и дека сите системи во телото работат на давање на здравствена предност на виталните органи.
Кога имаме висока температура, хипоталамусот, кој меѓу другото делува и како внатрешен термостат, сигнализира пораст на телесната температура. Во тој момент се покренуваат низа случувања, вклучувајќи стегање на крвните садови во периферните делови на телото заради насочување на крвта кон важните органи и намалување на губитокот на топлината на кожата.
Зголемувањето на телесната температура може да го забави растот на бактериите, да ја подобри одбранбената способност на белите крвни клетки и да поттикне создавање на биохемиско засилување. Повеќето вируси и бактерии може да преживеат во телото на нормална телесна температура, но треската може да им го отежне преживувањето.
ШТО ОБИЧНО ПРЕДИЗВИКУВА ТРЕСКА?
Голем е списокот на потенцијални здравствени проблеми кои може да предизвикаат покачена температура, но тие обично може да се вбројат во следниве категории:
- Инфекции
- Одредени лекови
- Карциноми
- Автоимуни болести
- Некои детски вакцини
Сепак, инфекција, било таа да е бактериска, габична или вирусна, обично е најчестата причина за треска.
“Вирусите на настинка се најчести причинители на високата температура, а пред КОВИД-19 на луѓето би им рекле да пуштат работите да се одвиваат по својот тек. Вирусите на настинка се типични коронавируси, но SARS-CoV-2 е далеку поопасен од останатите“, вели д-р Роси Гулати за списанието Health.
Поголем процент од високите температури предизвикани се од вируснии бактериски инфекции, а долготрајната, необјаснива треска може да предизвика, но многу ретко, и системски ревматски болести и карциноми.
ШТО ДА НАПРАВИТЕ ПРИ ПОЈАВА НА ВИСОКА ТЕМПЕРАТУРА?
Важно е да имате предвид дека додека се чувствувате релативно добро, не мора нужно да се зема ништо против покачената температура. Меѓутоа, ако се чувствувате непријатно и имате многу висока температура, може да се намали со лекови (парацетамол ибупрофен). Важно е да останете и хидрирани.
Обрнете внимание и на останатите симптоми, кои на вашиот лекар може да му помогнат да открие што ја предизвикало треската.
“КОВИД-19 промени се што се однесува до грижата за пациентите кои имаат покачена температура и обично додека ги разгледуваме причините за нивните болести, правиме и тестирање на новиот коронавирус“, вели д-р Гулати.
