Угледниот пулмолог проф. д-р Дејан Докиќ демантира дека тој е авторот на текстот што се споделува на социјалните мрежи и на Вибер, а кој се однесува на актуелната состојба со Ковид-19 во земјава, како и препораки околу тоа како да се справиме со пандемијата.
„Категорично демантирам дека сум автор на текстот кој интензивно се шири на социјалните мрежи, а кој веројатно е направен и пласиран со цел да преку злоупотреба на моето име се шири паника во јавноста и на тој начин се поткопува добербата на граѓаните во јавното здравство“, изјави вчера проф. Д-р Дејан Докиќ, директор на Клиниката за пулмологија и алергологија во Скопје, на заедничка прес конференција со министерот за здравство Венко Филипче.
Проф. Докиќ рече дека делото е пријавено во полиција и смета дека институциите коишто се надежни за ова, ќе превземат мерки и ќе ги објават лицата кои ја направиле оваа злоупотреба, за да биде пример и да се престане со ширење на паника и создавање на погрешна перцепција кај населението во делот на недоверба за функционирањето на јавниот здравствен систем.
“Како што кажа и министерот Филипче, во земјава има доволно сместувачки капацитети за сите пациенти со КОВИД-19 на кои им е потребна хоспитализација. Ги уверувам граѓаните дека ние лекуваме според протоколи кои се користат во западноевропските земји и САД. Голем број на пациенти се излекувани во нашиот КОВИД центар на Интерните клиники. Статистиките покажуваат дека кај нас смртноста е околу 25% на 1.200 излекувани пациенти, што е во рамките на западноевропските ковид центри каде смртноста се движи помеѓу 22 и 30 проценти“, потенцира проф. Докиќ.
„По 30 часа поминати на работното место во ковид-центарот на клиниката, максимално изморен, уплашен и тажен од сѐ што се случува тука, чувствувам лекарска, но пред сѐ човечка одговорност да ја пренесам следната информација. Капацитетите во болниците се пополнети до максимум, ретко некаде се наоѓа по едно-две легла. Во приватните клиники е слична состојбата, и покрај тоа што таму се цените толку високи, што луѓето ставаат домови под хипотеки за да го спасат живот на најблиските. Вакцини нема, но и да беа порано дојдени немаше да имаме ефект од нив, зошто треба да поминат најмалку шест недели по нивното добивање за да се постигне имунитет. Вакцинираните се штитат самите себе, но можат да го пренесуваат вирусот на други! Овој бран е досега најголем и најтежок и буквално коси!!!“, се вели меѓу другото во „важното предупредување“.
Министерот за здравство д-р Венко Филипче и проф. д-р Дејан Докиќ, по повод овој случај, денеска во 13 часот ќе дадат изјава за медиумите во дворот на Деканатот на Медицинскиот факултет во Скопје.
