Во Европа стигна новиот сој на коронавирусот наречен кракен, кој предизвикува голем интерес во јавноста. Пулмологот и директор на Клиниката за пулмологија и алергологија, проф. Д-р Дејан Докиќ одговара на тоа дали може овој сој наскоро да се очекува и во македонскиот здравствен систем.
“Секој досегашен сој на коронавирусот се појави и во нашата земја, така што логично и очекувано е да се појави и овој нов поттип кракен. Овој поттип на омикрон многу брзо се шири, го избегнува имунитетот, ги погаѓа и оние кои се вакцинирани и оние кои прележале КОВИД-19. Но, како и сите досегашни подсоеви од омикрон типот, не очекуваме дека ќе предизвика потешка клиничка слика. Кај населението кое не е вакцинирано и кое има други хронични проблеми можеме да очекуваме и компликации“, објаснува проф. Докиќ.
Со оглед на состојбата во САД каде за многу кусо време се зголеми бројот на заразени со кракен сојот, проф Докиќ вели дека може да очекуваме зголемување и кај нас.
“Мора да бидеме свесни дека пандемијата не ја победивме и дека не сме безбедни се додека се присутни вирусите“, потенцира професорот.
Тој апелира до сите граѓани со благи симптоми на грип и вируси да останат дома, во болница е потребно да се дојде само во случај на потешки симптоми, се со цел да не се преоптовари здравствениот систем.
Зошто во моментов е голем бројот на граѓани кои се жалат на респираторни состојби, односно проблеми тој вели:
“Пред се мора да сме свесни дека сега е период на грип и сите останати респираторни инфекции. Доминира грипот кој сега е многу посилен во однос на последните две години, кој го избегнувавме поради оправданите мерки против ковидот. Имуниот систем кај многу граѓани е ослабен. Затоа денес сме во ситуација да имаме поголем број на заразени од сите други респираторни инфекти“, потеницра проф. Докиќ.
