Проф. д-р Глигор Димитров: Што кога жената се соочува со ПЦОС – полицистичен оваријален синдром

Полицистичниот оваријален синдром (ПЦОС) е состојба која се карактеризира со ирегуларни менструални циклуси, појава на акни и масна кожа, пораст на дебели црни влакна на лицето и косопад. Кај пациентките со ПЦОС е забележана тешкотија за забременување. Тој е многу чест синдром и зафаќа 5-10 отсто од жените.

Пишува: Проф. д-р Глигор Димитров
Гинеколог

ШТО ГО ПРИЧИНУВА ПЦОС

За разлика од нормалните овариуми кои создаваат еден голем Графов фоликул еднаш месечно, полицистичните овариуми создаваат многу мали фоликули кои не можат да продуцираат доволно количество на хормони и да постигнат хормонален баланс во организмот кој ќе овозможи овулација. Затоа жените кои имаат ПЦОС имаат нередовни и ановулаторни менструални циклуси.

КОИ СЕ СИМПТОМИТЕ

Жените кои имаат ПЦОС ги имаат следниве симптоми:

  • Имаат помалку од 8 циклуси годишно
  • Добиваат поголема тежина и стануваат обезни
  • Им растат темни дебели влакна на места кои се карактеристични за мажите – на лицето, брадата, на градите и на стомакот
  • Се соочуваат со косопад
  • Им се јавуваат акни
  • Имаат тешкотии за забременување

Ако се прашувате дали треба да побарате лекарска помош ако ги имате овие симптоми, одговорот е: Да, секако.

Лекарскиот преглед е неопходен за дијагностицирање на ПЦОС, како и негово разликување од други можни заболувања или коморбидитети како што се дијабетесот, хиперлипидемијата и срцевите заболувања.

КОИ ТЕСТОВИ ТРЕБА ДА СЕ НАПРАВАТ

Вашиот доктор ќе ви ги препорача соодветните тестови кои вклучуваат:

  • Крвни анализи за мерење на хормони, гликемија и холестерол
  • Тест за бременост, ако имате доцнење на менструација
  • Ултразвук на карлица за процена на матката и состојбата на овариумите

КАКО СЕ ЛЕКУВА

Прв пристап за лекување на полицистичниот оваријален синдром кај обезни жени е редуцирање на нивната тежина. Со губење на само 5 отсто од тежината може да дојде до сериозно подобрување на симптомите. Затоа жените се охрабруваат на диета и на физичка активност. Медикаментозниот третман како прв избор на терапија ги опфаќа контрацепциските средства. Други лекови кои може да се даваат се антиандрогени, прогестини, метформин и др.

ШТО АКО ЖЕНАТА САКА ДА ЗАБРЕМЕНИ

Тешкотиите за забременување се честа појава кај пациентки со ПЦОС, но тие не треба да губат надеж. Секогаш може да се пристапи кон индукција на овулација со соодветни лекови кои имаат одлична стапка на успех. Постои и оперативен лапароскопски метод за третирање на овариумите, кој овозможува регулирање на овулациите.

ЖИВОТ СО ПЦОС

Пациентките со ПЦОС можат да водат најнормален живот, но е важно да се прават редовни контроли за да се заштитат од други болести.