Прошетки во природа, трчање или пливање, бидете активни за подобро здравје

Повеќето луѓе под физичка активност подразбираат интензивна физичка активност, но основната човечка физичка активност е всушност одењето

Walking in nature. (iStock)

Недостатокот на физичка активност, придружен со хроничен стрес и погрешна исхрана се еден од главните причини за болестите на современиот човек.

Повеќето луѓе под физичка активност подразбираат интензивна физичка активност, но основната човечка физичка активност е всушност одењето. Во статијата на палеонтологот Лорен Кордејн, се открива дека нашите предци поминувале дневно помеѓу шест и 16 километри во потрага по храна. Жените, пак, дополнително, со себе в рака ги носеле и децата. Според некои проценки жените поминуваат до 4.800 километри со детето во раце, до неговата четврта година.

Денешната цивилизација ги одврати луѓето од потребата за одење. Според Студија од 2003 година направена во САД, просечните мажи оделе по 5.340, а жените по 4.793 чекори на ден. Техничката дефиниција за пасивен начин на живот значи поминување на помалку од 5.000 чекори дневно. Споредбата со навиките на Амишите, на пример, е драстична. Мажите Амиши поминуваат 18.000 чекори, а жените 14.000.

Здравствените ефекти од пешачењето се големи. Заради подобрување на здравјето, секој може да одбере дали ќе практикува лесно одење во природа, трчање или пливање. Физичката активност ги намалува воспалителните процеси во телото кои се почетна точка за сите современи болести, од депресија, до дијабетес, алергии и ракот. Познато е дека за време на физичка активност се намалува нивото на маркерите на воспалителните болести, како CRP или интерлеукин 6. Студија открива дека 20 минути брзо одење го намалува нивото на маркерите за околу 5 отсто. Но, физичката активност мора да биде редовна, бидејќи ефектите по одредено време се губат.

Одењето има одличен ефект врз здравјето на кардиоваскуларниот систем. Се разбира, не треба да се претерува, бидејќи постојат докази дека преоптоварувањето на срцето при интензивно вежбање е штетно. Физичката активност го забавува и стареењето, а смртноста од канцер е двојно помала кај физички активните луѓе.

Колку физичка активност ни треба? Се препорачува од 150 минути до шест часа неделно, а нивото на активност треба да се прилагоди на возраста.

Децата кои имаат доволно физичка активност имаат помали шанси да имаат прекумерна тежина, спијат подобро и се посигурни. Констатирано е дека вклучувањето на децата во спортски активности во училишната возраст позитивно влијае на развојот на когнитивните функции и на емоционалната интелигенција.

Спортувањето во младоста гарантира здраво стареење.