Најмалку 99 отсто од починатите лица како последица на новиот коронавирус во САД во последните шест месеци не биле вакцинирани, покажуваат податоците на тамошниот Центар за контрола на заразни болести. И додека властите состојбата ја нарекуваат “пандемија на навекацинирани“, лекарите од терен сведочат за тоа дека некои пациенти предоцна сфаќаат дека требало да се вакцинираат.
Д-р Бритни Кобиа од Грандвју медикал центарот вели дека само еден нејзин пациент е вакциниран, додека сите останати не се вакцинирани, а дека за тој еден имунизран очекува дека комплетно ќе се опорави откако му било давано кислород. Неколкумина други, додава таа, умираат.
“Во болницата примам млади и здрави луѓе со сериозни инфекции. Меѓу последните работи што ги прават пред интубација е тоа да ме молат да ги вакцинирам. Ги држам за рака и им велам дека ми е многу жал, но дека е доцна. Неколку дена подоцна, откако ќе прогласам смрт на пациентот, ги прегрнувам членовите на семејството и им велам дека најдобар начин да оддат почест на нивните сакани е тој да се вакцинираат и да ги охрабрат другите да го направат истото. Тие плачат и ми велат дека не знаеле. Мислеле дека е измама. Мислиле дека тоа е политика. Мислеле дека затоа што имаат одредена крвна група или боја на кожата нема да се разболат. Мислеле дека тоа е ‘само грип’. Но, згрешиле. Тогаш сакаат да го вратат времето, но не можат. Па ми се заблагодаруваат и одат да се вакцинираат“, раскажува д-р Кобиа.
Здравствените власти во Алабама неодамна објавија дека 96 проценти од оние кои починале од последици од КОВИД-19 од април, не биле целосно вакцинирани. Меѓу оние кои подлегнале на болеста се и оние заразени со делта сојот, многу позаразен од оригиналниот сој. На него се однесуваат околу 83 проценти од новозаразените во САД, што е драматично зголемување од 50 проценти, колку што изнесувал во првата недела од јули.
