ФДА од САД предупредува дека употребата на високи дози на витамин Б7 (биотин) во исхраната и како суплемент може да интерферира и влијае на многу лабораториски анализи, влучувајќи и некои во ургентните центри, а кои може да направат проблем во дијагностиката на акутниот инфаркт.
Биотинот го има во многу мултивитамински препарати, а се користи и во формули кои на пазарот се продаваат за подобрување на цврстината и растот на косата и ноктите. Притоа дози од 5-10 милиграми во доза се најчесто присутни во витаминските суплементи што одговара на 166 % – 333 % повеќе во однос на 30 микрограми, потребната пропишана доза кај најголемиот број на луѓе.
Понекогаш лекарите препишуваат повисоки дози на биотин при третман на невролошките болки кај болни со невропатии, но и кај болни со мултиплекс склероза. Утврдено е дека кај некои пациенти екцесивниот внес на биотин дава лажни високи резултати од некои лабораториски тестови, а во некои случаи резултира со лажно негативни или ниски резултати. Еден од овие тестови е детекцијата на протеинот кој е наречен тропонин, кој вообичаено расте при оштетување на срцевиот мускул при миокарден инфаркт. Тропонинот се користи за диференцијација на етиологијата на градната болка дали доаѓа поради миокарден инфаркт. ФДА тврди дека пациенти кои земаат поголеми дози на биотин можат да умрат поради лажно ниски вредности на тропонин и покрај миокардниот инфаркт.
Високиот внес на биотин при лабораториското тестирање на тироидните хормони може да заведе и да се воспостави дијагнозата на Граве-овата болест кај деца или возрасни. Тоа е една автоимуна болест причинета од високата количина на тироидните хормони кај деца или возрасни.
Суплементите со биотин може да влијаат и на тестовите за срцева слабост, бременост, канцер или анемија поради дефицит на железо. Така, една студија која е направена од Дани Ли, PhD, директор на клиничката биохемија на University of Minnesota Medical Center, покажала дека кај шест здрави возрасни особи кои земале 10 милиграми биотин на ден за една недела, кај кои биле направени лабораториски тестови пред и по земањето на биотин во период од една недела, 40 % од тестовите биле исфрлени од евалуација после земање на суплементите.
Во друга студија од Ерл Холмс, PhD, професор по молекуларна фармакологија и терапија на Loyola University School of Medicine во Maywood, IL, со анализа на 374 тестови кај 221 е најдено дека пациентите користат суплементи кои содржат биотин, а за само 80 од нив има напомена за внимание до лабораторијата.
Затоа последната препорака на ФДА е сите пациенти кои користат суплементи да проверат која е дозата на истите, особено дали и колку во нив има биотин и да го информираат својот лекар за истиот пред правење на лабораториски тестови. Препорака е и за пациентите кај кои е потребно да се прават контролни лабораториски тестови, да се прекине внесувањето на биотин барем една недела пред тестовите како суплементи и да се намали внесот на храна што содржи биотин – месо, црн дроб, јајца, риба, ореви, семки и некои зеленчуци како што е благиот компир.
Заклучок: ПРОВЕРЕТЕ ГО ВАШИОТ ВНЕС НА БИОТИН ПРЕД ДА ПРАВИТЕ ЛАБОРАТОРИСКИ ТЕСТОВИ ИЛИ ЗАПОЗНАЈТЕ ГО ВАШИОТ ЛЕКАР СО КОЛИЧИНАТА НА БИОТИН КОЈА ЈА ВНЕСУВАТЕ КАКО СУПЛЕМЕНТ.
(Преземено и преработено од Brenda Goodman, MA, од WebMD)
