Заврши учебната година, со нетрпение ги очекуваме свидетелствата, распустот зема замав. За многу родители овој период од годината кога децата се распуштени е голем предизвик: што да се прави во текот на летото, каде да се оди со децата, да се остават намира или да учат ново градиво? Ова се само дел од дилемите со кои се соочуваат повеќето родители.
Училишните психолози советуваат дека е многу важно децата добро да се одморат за време на распустот. Велат дека е корисно со децата да се зборува за постигнатиот успех, за тоа што можело да биде подобро или поразлично, но притоа да не забораваат дека за децата е важна и играта и одморот од училишниот материјал.
Децата не треба да се казнуваат со забрана на активности поради евентуалниот неуспех на училиште. Децата учат низ играта и затоа е важна паузата од учењето и исполнувањето на барањата во смисла на рокови
Со квалитетна комуникација родителите можат да постигнат детето да стане свесно за евентуалните пропусти и идната учебна година да ја започне со поставени цели.
Ситна обврска во домот
Имајќи предвид дека со распустот децата добиваат многу слободно време, не е неважно да се испланира како детето ќе ги минува долгите летни денови.
Некои од можностите вклучуваат посета на различни кампови, летни работилници, курсеви, одење во природа или на базен. Покрај различните активности и содржини, важно е на децата да им најдете и некоја обврска дома, бидејќи на тој начин ќе стекнат работни навики.
Игра надвор
Сетете се само како вие сте ги минувале распустите кога сте биле деца… Топка, јаже за прескокнување, ластик… беа главните адути со кои никогаш не ви беше досадно. Нека бидат на воздух и активни. Единствено морате да поставите правила за тоа колку долго и во кое време може да бидат надвор и да се јавуваат на мобилен телефон.
Лектири
Психолозите советуваат дека децата освен што не треба да се тераат да учат преку летото, не треба ни да се присилуваат да читаат лектири. Тоа ќе го прават кога ќе тргнат на училиште. Доколку, пак, самите сакаат да читаат – нека читаат нешто по нивен избор. Нема потреба ни да го повторуваат материјалот од претходната година пред крајот на распустот. И онака со тоа ќе се занимаваат на првите училишни часови во почетокот на септември.
