Псоријазата е автоимуна кожна болест која е доста честа, а точната причина за нејзиното појавување не е позната. Таа предизвикува клетките на кожата да се размножуваат десет пати побрзо од вообичаеното, па потоа се јавуваат испапчени делови на кожа, слични на мали плускавци, како и чешање и различна боја на кожата.
ШТО Е ПСОРИЈАЗА?
Псоријазата е кожна болест која предизвикува воспаление на кожата, а може да се препознае по промените на кожата, односно делови од кожата ќе бидат во друга боја, црвена или розова и ќе бидат покриени со рани. Постојат неколку видови на псоријаза, од кои најчест е плак псоријазата, кај која се појавуваат лушпести наслаги на кожата. Наслагите се видливи промени чиј дијаметар е поголем од 10 милиметри, а се издигнати над кожата.
ШТО ПРЕДИЗВИКУВА ПСОРИЈАЗА?
Точната причина за оваа состојба не е позната, но се знае дека станува збор за автоимуна болест, односно состојба кога имуниот систем ги заменува здравите клетки со туѓо тело, а како резултат на тоа се создаваат промени на кожата. Исто така, најчесто се работи за состојба која се пренесува генетски, односно родителите може да ја пренесат псоријазата на своите деца, додека во некои случаи може да има прескокнување на генерации.
Влошувањето на псоријазата може да биде предизвикано од различни фактори, кои ќе бидат различни за секоја личност. Тука спаѓаат стресот, одредени инфекции, повреди како што се исеченици, одредени лекови или промени во температурата на телото, како во зима или во лето, што ќе влијае на повеќе црвенило или наслаги.
КОИ СЕ СИМПТОМИТЕ?
Лицата кои ја имаат оваа состојба ќе имаат фази кога промените на кожата ќе бидат поизразени, но и фази кога ќе бидат едвај забележливи. Првите знаци на псоријаза се мали испакнатини или јазолчиња кои се лупат. Псоријазата може да се препознае по:
- Осип или нерамнини на кожата
- Поинакви делови на кожата
- Наслага која лесно ќе се лупи
- Сува и испукана кожа
- Чешање
- Болки во зглобовите при псоријатичен артритис
Псоријазата може да се појави било каде на кожата, но најчесто промените можат да се забележат на лактите и колената, лицето, скалпот, ноктите, гениталиите, долниот дел на грбот или на дланките и нозете. Исто така, често само мал дел од телото ќе биде покриен со црвенило. Важно е да се напомене дека псоријазата не е заразна и не може да се пренесе со контакт со лице кое ја има.
КАКО СЕ ДИЈАГНОСТИЦИРА?
Псоријазата ја дијагностицира дерматолог кој може да ја погледне кожата на пациентот и да поставува различни прашања за самата состојба. Во некои случаи потребно е да се направи биопсија на кожата.
ТРЕТМАН
Не постои лек за псоријаза бидејќи се работи за хронична состојба на кожата, што значи дека симптомите може да се појават и да исчезнат. Сепак, постојат голем број на лекови и креми што ги препишува лекар, а кои ги ублажуваат симптомите и го забавуваат развојот на нови клетки на кожата. Најчесто се користат кератолитици за отстранување на лушпите од кожата, а може да се користат и кортикостероиди. Важно е и земањето витамин Д, цигнолин и локално ретиноиди, а може да помогнат и одредени креми кои содржат висок процент на уреа, а кои ги препорачал лекар.
