Иако болката предизвикана од ладна или жешка храна може да значи и дека имате кариес или расипана пломба, многу често, таа е знак дека вашите заби се чувствителни.
Осетливоста на забите (дентална осетливост) се карактеризира со појава на остра, краткотрајна болка која се јавува поради температурни, хемиски и слични надразби.
Кои се симптомите?
Лицата кои страдаат од оваа состојба може да почувствуваат болка и непријатност како одговор на:
- топли намирници или пијалаци,
- ладни намирници или пијалаци,
- ладен воздух,
- слатка храна или пијалаци,
- кисели пијалаци или намирници,
- ладна вода,
- миење заби,
- испирање на усната шуплина со течност за испирање.
Што ја предизвикува осетливоста на забите?
Некои луѓе едноставно имаат чувствителни заби поради тенкиот емајл кој го штити забот, а кој може да се оштети доколку:
- користите многу тврда четка,
- страдате од бруксизам – чкрипење на забите во сон,
- често консумирате кисели намирници и пијалаци.
Понекогаш и други состојби на организмот можат да предизвикаат чувствителност на забите. Една од нив е гастроезофагеална рефлуксна болест – ГЕРБ, која значи излачување на јаки киселини од желудникот во усната шуплина, која може да го уништи забниот емајл. И повлекувањето на забното месо го остава забот изложен на надворешни влијанија и така го прави чувствителен.
Запомнете!
Не ги четкајте забите со тврда четка, одберете паста наменета за осетливи заби и задолжително користете течност за плакнење која не содржи алкохол.
