РЕЗУЛТАТИ ОД НОВО ИСТРАЖУВАЊЕ: Алкохолот може да има неверојатни придобивки за постарите од 40, но помладите ја немаат таа среќа

Студијата, објавена во списанието The Lancet, ги претставува најновите докази кои покажуваат дека умерено пиење е безбедно за лицата над 40 години.

Имаме одлични вести за луѓето кои имаат над 40 години. Имено, научниците тврдат дека може да испијат по една чаша вино или шише пиво секој ден, а тоа дури би можело да има и некои придобивки за нив. Студијата објавена во списанието The Lancet, ги претставува најновите докази кои покажуваат дека умереното пиење е безбедно.

Со години, спротивставените студии не збунуваа. Некои истражувања препорачуваа чаша вино, а некои во целост ја забранија. Сега, се чини,  повторно дозволуваат, но само на лица над 40 години без поголеми здравствени проблеми.

Како може алкохолот да им помогне на лицата во средна и постара доба?

Истражувачите од Универзитетот Вашингтон, кои пресметале колку луѓето можат да пијат пред да им биде загрозено здравјето, истакнуваат дека умереното пиење има здравствени придобивки за возрасните средовечни луѓе. Односно, може да помогне во спречување на срцеви заболувања и дијабетес тип 2, а и дека потенцијално може да спречи прерана смрт.

Научниците веруваат дека умереното количество алкохол може да го зголеми нивото на добриот холестерол и антиоксиданти во крвта, што може да го подобри здравјето на срцето.

Исто така, се смета дека го подобрува нивото на гликоза во крвта и го зголемува нивото на адипонектин, хормон кој ја подобрува чувствителноста на инсулин, заштитувајќи од дијабетес тип 2. Секако, на постарите од 40 години им се советува умерено консумирање алкохол.

Лицата на возраст од 40 до 64 години можат да пијат помеѓу половина до два пијалаци дневно, а еден пијалок се класифицира како оној што содржи 10 гр чист етанол, пред нивната навика да стане ризик. Исто така, оние над 65 години би можеле да испијат до 3,5 пијалаци дневно без да им се влоши здравјето. Истражувачите велат дека еден стандарден пијалак е еднаков на мала чаша црвено вино, лименка или шише пиво, или чаша виски или друг жесток алкохол.

А како научниците дошле до овие сознанија? Истражувачите од Универзитетот Вашингтон ја испитувале базата на податоци Global Burden of Disease, која содржи здравствени податоци и трендови ширум светот. Користејќи го ова, тие создале модел за пресметување кога ризиците од пиењето ги надминуваат сите придобивки.

Зошто помладите не би требало да пијат алкохол?

За оние под 40 години, алкохолот, што се однесува до ова истражување, сè уште е целосно забранет. Не само што не дава никакви здравствени придобивки, туку претставува и ризик, зголемувајќи ја веројатноста за повреди, сообраќајни несреќи и самоубиства. Утврдено е дека младите се најмногу изложени на ризикот од штетното дејство на алкохолот.

Ако веќе пијат, тоа треба да биде исклучително умерено. За помладите мажи е кажано да се држат до само 10 мл вино или 38 мл пиво, додека жените може да испијат 30 мл вино или 100 мл пиво. Што е невообичаен резултат на студијата, бидејќи претходните препораки беа дека жените треба да пијат помалку, а мажите повеќе.

Д-р Емануела Гакиду, еден од авторите на студијата, вели дека постарите луѓе може да имаат корист од пиењето во мали количини, додека младите не треба да пијат.

“Иако можеби не е реално да се мисли дека младите возрасни ќе се воздржат од алкохол, мислиме дека е важно да се соопштат најновите докази за секој да може да донесе информирани одлуки за своето здравје“, потенцира д-р Гакиду.

Понатаму, шест од 10 луѓе кои пиеле штетни количини алкохол биле на возраст од 15 до 39 години, при што тоа е една милијарда мажи и 300 милиони жени. Штетната употреба на алкохол била најголема меѓу младите мажи во Австралија, Западна и Централна Европа.

“Иако ризиците поврзани со консумирањето алкохол се слични за мажите и жените, младите мажи се издвојуваат како група со највисоко ниво на штетно консумирање алкохол. Тоа е затоа што поголем дел од мажите во однос на жените консумираат алкохол и нивното просечно ниво на консумирање е исто така значително повисоко“, објаснува д-р Гакиду.

Водечкиот автор Дејна Брјазка, истражувач во Универзитетскиот Институт за мерење и проценка на здравјето, вели дека дури и ако во насоките за алкохол се користи најниско ниво на безбедно консумирање, резултатите имплицираат дека препорачаната количина на алкохол е сè уште превисока за помладата популација.

Што покажаа претходните студии?

Претходните студии покажаа дека оние кои пијат поголеми количини алкохол се повеќе изложени на ризик од рана смрт отколку луѓето кои умерено пијат алкохол. Исто така, премногу пиење може да го зголеми ризикот од рак, срцеви заболувања и болести на црниот дроб.

Други истражувања пак тврдат дека дури и мало консумирање е опасно бидејќи претходно било поврзано со рак и лошо здравје на мозокот. Ова ги поттикна некои луѓе целосно да избегнуваат алкохол.

Се смета дека околу 1,78 милиони луѓе ширум светот починале во 2020 година поради консумирање алкохол, при што мажите на возраст од 15 до 49 години се најризичната група.