Ризик фактори за губење на забите

Експертите по стоматологија набројуваат осум ризик фактори за губење на забите како резултат на периодонтално заболување.

Едно истражување покажало дека заболувањето на непцата е главната причина за губењето на забите. Во истото истражување се докажува дека мажите и лицата над 35 години се посклони на ова заболување од причина што не обрнуваат толку внимание на својата дентална хигиена и не одат на стоматолог се додека не ги заболи заб.

Три од десет пациенти кои страдаат од заболување на непцата се или биле пушачи. Се верува дека поврзаноста меѓу пушачите и губењето на забите е уште потесна. Близу 40 % од пациентите речиси никогаш не се јавиле на стоматолог, а единствено 13 % биле на стоматолог шест месеци пред губење на забите. Најмногу од пациентите, дури 60 %, рекле дека ниту еднаш не ги измиле забите, а само 16 % се изјасниле дека ги мијат забите двапати во денот.

Многу од пациентите, исто така, имале и други здравствени проблеми. Речиси еден од петмина имале дијабетес тип 2, а докажано е дека дијабетесот и губењето на забите се тесно поврзани. Едно од десет лица имале висок крвен притисок, како и ревматоиден артритис.

Како и  кај повеќето заболувања, некои од ризик факторите не можеме да ги контролираме. Како ризик фактор се наведуваат:

  • Возраст над 35 години;
  • Заболувањата на забите се почести кај машкиот пол поради нередовната хигиена и посета на стоматологот;
  • Никогаш или многу ретко посетувате стоматолог;
  • Никогаш или многу ретко сте користеле четка за заби;
  • Сте пушеле цигари или се уште пушите;
  • Имате дијабетес;
  • Имате висок крвен притисок;
  • Имате ревматоиден артритис.