Кај лицата кои во средни години на телесна тежина просечно добиваат пет, шест килограми, лекарите воочиле значително поголема веројатност за потреба за замена на зглобот на коленото во повозрасниот период, покажало ново истражување.
Веројатноста за целосна замена на зглобот кај жените кои се здебелиле 5кг изнесува 34 проценти, а меѓу мажите 25 проценти.
Резултатите од новата студија откриваат дека дури и релативно мало зголемување на телесната тежина кај поединци ги зголемува шансите за развој на остеоартритис на коленото, најчеста причина за болка во колената и потребата од операција.
Остеоартритисот, познат и како остеоартроза или само артроза, е хронично прогресивно дегенеративно заболување на зглобовите, чија главна причина е пропаѓање на зглобната ‘рскавица.
После кардиоваскуларните заболувања, остеоартритисот е втора најчеста причина за хронична онеспособеност и тоа пред се на зглобовите на колкот и коленото, поради што превенцијата е исклучително важна.
Не постои лек за остеоартритис, но постојат бројни начини за ублажување на симптомите. Покрај лековите за ублажување на болката, многу се важна и промената во начинот на живот, истакнуваат експертите и додаваат дека во некои случаи единствената опција која останува е операција за замена на зглобот на коленото.
“Намалувањето на телесната тежина може да допринесе за ублажување на симптомите на остеоартритис на коленото, бидејќи така се намалува оптоварувањето на зглобовите, како и шансите за развој на штетни воспаленија“, вели професорката Анита Влука од австралискиот универзитет Монаш, која ја водела студијата.
“Но треба да се нагласи дека е тешко да се намали вкупната телесна тежина за најмалку 10 проценти за да се има минимален ефект врз намалувањето на болката во коленото, а уште потешко и да се одржи таа тежина, особено кога е присутен остеоартритис кој ја намалува подвижноста. Располагаме со докази дека одржувањето на оптимална телесна тежина за пациентот е полесна и поостварлива цел отколку нејзиното губење, па затоа спроведовме истражување за тоа на кој начин зголемувањето на телесната тежина е поврзано со симптомите и развојот на остеоартритис“, објаснува таа.
Рендгенските снимки упатуваат на тоа дека целокупното зголемување на телесната маса значително влијае на промените во зглобот, појавата на болка, вкочанетост и, во крајна линија, промените во квалитетот на животот на полошо.
Поради зголемување на телесната тежина и вишок килограми доаѓа до оштетување на ‘рскавицата, коските и другите делови од зглобовите. По проучувањето на конкретно две студии во кои се опфатени повеќе од 250.000 учесници, авторите заклучиле дека зголемувањето на телесната тежина значајно ги зголемува шансите оперативен зафат за целосна замена на зглобот на коленото.
