Ризикот од развој на рак на грлото на матката наскоро ќе може да се открие со едноставен тест на урината

Истражувачите од Велика Британија велат дека жените во иднина би можеле да го откријат ризикот од добивање рак на грлото на матката со едноставен тест кој ќе можат да го направат самите.

Ракот на грлото на матката покрај ракот на дојка е најраспространет меѓу жените. Се открива на гинеколошки преглед кој подразбира колпоскопски преглед и земање Папаниколау брис. Научниците од Британија тврдат дека жените наскоро ќе можат да го откријат ризикот од добивање рак на грлото на матката со тестирање на сопствената урина. Истражувањето кое е окарактеризирано како ветувачко е претставено на овогодинешната Конференција за истражување рак во Глазгов.

Студијата опфатила 600 жени кои на истражувачите им дале примероци од вагиналниот секрет и урина. Примероците биле тестирани со новиот „С-5 тест“ кој го произвела водачката на истражувањето, доктор Недјаи. Овој тест ги мери хемиските промени во ДНК кои можат да детектираат развој на претканцерогени клетки во цервиксот. Тестот се покажал како ефикасен и на вагиналниот секрет, но и на урината.

Истражувачите велат дека овој нов вид тест е вистински исчекор во откривањето на овие подмолни видови рак особено за оние жени кои не одат на редовни прегледи, за постарите жени, за жените кои сметаат дека редовниот гинеколошки преглед им е болен и за оние кои немаат пристап на прегледите кај гинеколог.

„Овој тест е одличен и за жените кои имаат психичка бариера од одењето кај гинеколог, како и за оние кои искусиле некоја траума“, заклучиле истражувачите.