Сауната го чува срцето исто колку и кардио вежбите

Испитувањето покажало дека по излегувањето од сауна, на сите учесници крвниот притисок им бил понизок, додека работата на срцето се движела со промени кои се исти како при правење на вежби при умерен тренинг.

Најновите истражувања на тим од научници на Универзитет во Финска покажуваат дека половина час во сауна е здраво за срцето колку што се здрави и добри и кардио вежбите. Според нив промените во виталните параметри при користењето на сауна, одговараат на умерен тренинг.

Финскиот тим истражувањето го спровело на 102 волонтери во сауна каде што температурата била 73 степени Целзиусови. Сите испитаници биле на просечна возраст од 50 години и кај секој од нив постоел по најмалку еден ризик фактор за појава на кардиоваскуларно заболување. Пред да влезат во сауна, на сите испитаници им биле контролиран и измерен крвниот притисок, телесната температура и дополнителни параметри. Истите параметри биле следени и веднаш по користење на сауната. Испитувањето покажало дека по излегувањето од сауна, на сите учесници крвниот притисок им бил понизок, додека работата на срцето се движела со промени кои се исти како при правење на вежби при умерен тренинг.

Претходно истражување покажало дека лицата кои одат во сауна го намалуваат ризикот од кардиоваскуларни болести, деменција, алцхајмерова болест и ненадејна срцева смрт.

Најновата студија се надоврзува на преходна направена од истите истражувачи во 2015 година за проценка на бенефитите на користењето сауна два до три пати во неделата и за тоа какви се ефектите за намалување на смртноста кај машката популација. Целта на ова истражување било да се види дали има разлика во стапката на смртност помеѓу две групи на мажи – оние кои редовно  користеле сауна и оние кои користеле сауна повремено. Според анализите по студијата која траела над 20 години, се покажало дека повеќе смртни случаи се евидентирани кај оние лица кои не користеле редовно сауна, отколку кај оние кои два до три пати недело ја користеле. Лицата пак кои биле во сауна четири до седум пати во седмицата  имале дури и помали шанси за умирање во овој период после 20 години.

Здравствените придобивки кои ги имале испитаниците не биле ограничени само на заштита од срцев удар и ненадејна смрт, туку со користењето на сауна тие го намалиле ризикот од смрт и од други причинители.

Сепак, лекарите укажуваат дека пациентите кои веќе имаат некакво заболување на срцето, треба да се воздржат од користење сауна.