Воспалението на синусите означува воспаление и отекување на синусната слузница, може да биде бактериска, вирусна, па дури и габична. Поради зголемено присуство на овие микроорганизми доаѓа до задебелување на слузницата, па синусите, кои се тесни, отежнато се празнат.
Параназални синуси се шуплини во коските на главата кои настанале поради исправување на човекот во текот на еволуцијата и неговото исправено одење. Тие шуплини се исполнети со воздух и обложени со респираторна слузница, иста како во носот и во белите дробови.
Постојат четири групи на синуси
- Максиларни (во внатрешноста на јаболчните коски);
- Фронтални (челни);
- Етмоидни (над носот и помеѓу очите);
- Синоидни (позади носот во центарот на главата).
Синусите поради обложеноста со респираторна слузница главно имаат респираторна функција. Содржината на синусите низ нивните отвори во носот се цедат и се дренираат нанадвор или кон грлото.
Најчести симптоми се притисок во главата и главоболка, обилен исцедок од носот и позади носот, а кај посилните воспаленија може да се појави и зголемена телесна температура. Доколку има гноен секрет тоа зборува дека можеби се работи за бактерско воспаление. Исцедокот помешан со крв од носот, исто така, збрува за воспаление и треба детално да се прегледа целата носна шуплина, најдобро фиберендоскопски. Воспалението на синусите најчесто почнува со обична настинка, а по неколку дена се подобрува состојбата, но лицата со заболени синуси никако целосно да оздрават. За жал, проблемите со синусите продолжуваат. Воспалението најчесто се јавува како последица на често менување на дневната температура.
Ова воспаление не треба да се сфати како некоја лесна инфекција бидејќи лесно може да прерасне во хронична болест.
Често поради хиперреактивност на носната слузница на надворешни влијанија, како на пример, алергии, промена на температурата, доаѓа до симптоми слични на класичното воспаление (главоболка и притисок). Тоа нужно не значи дека состојбата е инфективна, туку дека дошло до отекување на слузницата со запушување на каналите од синусите кон носот. Тоа се најчести тегоби со синусите и често се заменуваат со класичното воспаление и неоправдано се лекуваат со антибиотици.
Секогаш целта на терапијата за воспаление на синуси е тие да се исцедат, да нема воспален секрет во синусните шуплини и уредно да се одржува дишењето низ нос.
Превенцијата на воспалението кај лица кои се склони кон тоа е многу тешка. Прва причина е сколноста на тие лица кон отекување на слузницата на носот и на синусите, второ, секогаш постои изложеност на микроорганизми во секојдневниот живот. Секако, е важно да овие лица не се изложуваат на температурни промени. При први знаци на тегоби, треба да се користат средства за нос и подобро дишење, а со самото тоа ќе се подобри и дренажата на секретот. Лицата со алергии кои имаат чести тегоби со синусите, потребно е одредено време во годината да земаат антиалергиска терапија.
