КОВИД-19 денес е дел од нашите животи, шест месеци откако Светската здравствена организација прогласи пандемија со оваа инфекција. Тоа е непријател за кој научивме многу, иако никој не го знае одговорот на прашањето што не чека оваа есен и зима.
ШТО УШТЕ НЕ ЗНАЕМЕ?
Дали епидемијата повторно ќе се разгори?
Поради големото мешање на луѓе во текот на летото, по укинување на пролетниот карантин, бројот на заразени во Европа нагло расте. Така е во Франција, Шпанија и Велика Британија, како и во многу други земји, иако не се работи за нивоа какви беа на пикот на епидемијата во март и април.
“Илјадници новозаразени на ден, тоа е премногу. Тоа е многу загрижувачки“, оцени министерот за здравство на Франција, Оливер Веран.
Ако вака потрае, Велика Британија ќе доживее “турбулентен период во месеците кои доаѓаат“, изјави Џонатан Ван-Там, еден од главните советници за здравство.
Зголемувањето на бројот на заразени автоматски ќе доведе до поголем број на тешки случаи за неколку недели, предупреди Веран. Но, прашањето е во кои размери?
По првиот бран, многу лекари стравуваат дека болниците и одделите за интензивна нега оваа есен повторно ќе бидат пренатрупани, како во март. Вирусот сега циркулира најмногу меѓу младите, кои не се ризична група, но повозрасните и оние со послабо здравје неизбежно ќе бидат погодени, предупредуваат лекарите.
Други експерти пак сметаат дека ризикот од преоптоварување на болниците е помал отколку што беше во пролет, бидејќи лицата кои спаѓаат во ризични групи ги почитуваат епидемиолошките мерки.
Најоптимистичните лекари сметаат на имунитетот стекнат во првиот бран, надевајќи се дека тој ќе спречи втор бран и ќе овозможи да се избегне повторување на катастрофата од март. Но, тоа е само претпоставка.
Сите, меѓутоа, инсистираат на важноста на почитување на епидемиолошките мерки, како што се носење маска, често миење на рацете и почитување на физичко растојание.
РЕИНФЕКЦИИ И ИМУНИТЕТ
Неколку случаи на лица кои оздравеле од коронавирусот и потоа повторно се заразиле, забележани се во изминативе недели во светот, што го наметнува прашањето за трајност на имунитетот. Стручњаците нагласуваат дека сепак не може да се извлече заклучок на основа на неколку случаи и дека вистинското прашање не е дали лицето може да се зарази два пати, туку колку тоа е заразно вториот пат.
Општо, имунитетот против КОВИД-19 се уште слабо се разбира. Научниците се фокусирани на антителата, но исто така се надеваат дека друг тип на имунолошки одговор, кој се темели на Т-лимфоцитите, може да ја стопира епидемијата. Но, тоа е само теорија.
ШТО НЕ Е СИГУРНО?
Улогата на децата
Училишната година почна во многу земји, но се уште точно не се знае каква улога имаат децата во ширење на заразата.
Едно е сигурно: ретко заболуваат од КОВИД-19. Повеќето развиваат нлага форма на болеста или воопшто немаат симптоми. Но, не се знае дали се еднакво заразни како и возрасните.
“Кога ќе се појават симптомите, децата излачуваат еднаква количина на вирусот како и возрасните и еднакво се заразни како и тие. Не се знае во која мера асимптоматските деца може да заразат други“, истакнуваат од Европскиот центар за превенција и контрола на болести.
Неколку истражувања покажале дека децата ретко ја пренесуваат болеста, можеби затоа што имаат помалку симптоми, со оглед дека кашлањето и кивањето го зголемува ризикот од пренос на вирусот.
Многу струччњаци предупредуваат дека сепак треба да се разликуваат децата од адолесцентите, кои по заразност се слични со возраните.
ВАКЦИНА: Брза и добра, дали е тоа можно?
Пронаоѓањето на ефикасна и безбедна вакцина се смета за најдобриот начин за стопирање на пандемијата. Но, не се знае кога тоа ќе се случи и покрај многубројните најави за скоро нејзино откриваање. Во последниот извештај, Светската здравствена организација наведува 35 потенцијални вакцини кои се во фаза на клинички испитувања на луѓе.
