Шест причини за болки во вратот

Вкочанетост и болки во вратот се многу чести тегоби кои може да се појават во секое време. Може да бидат последица од контракција на мускулите, а го отежнуваат движењето и создаваат чуство на непријатна вкочанетост.

Миогена вкочанетост на вратот – Последица од вродено пократок мускул на надворешната страна на вратот. Причина може да биде миозитис, односно воспаление на мускулите во ембрионалниот стадиум или хематом до кој дошло при породувањето. Често се ресорбира сам од себе без последици, но понекогаш останува и фиброзна лузна, поради скратување на мускулот. Симптоми за миогена вкочанетост на вратот препознатливи на прв поглед: вратот е искривен, присутна е болка, а движењата се ограничени.

Обична вкочанетост на вратот – Станува збор за контракција на мускулите, предизвикани од нагли движења, најчесто погрешна положба при спиење или од провев. Може да биде поврзана со артроза или хернија. Се јавува силна болка и отежнато движење. Болката се појавува и исчезнува одеднаш.

Артроза на вратот – Артоза е дегенеративна болест на зглобовите која се појавува како последица на дегенеративни промени во зглобната ‘рскавица. Како последица од оштетувањето (дегенерација) на зглобната ‘рскавица, доаѓа до промена на формата на самите зглобни тела. Оваа болест речиси секогаш се јавува кај лица над 50 години, но може да се јави и порано. Дегенеративните болести имаат хроничен тек, може да бидат предизвикани со некоја почетна траума, но тоа не е директна причина.

Хернија на дискот – До хернија доаѓа кога еластичната и отпорна структура, која делува како перниче меѓу двата пршлена, се деформира, односно се поместува од местото и ги притиска корените на нервите, кои излегуваат од ‘рбетниот мозок. Тој притисок предизвикува силна болка во вратот и рацете.

Цисти на вратот – Цистите на вратот се присутни од самото раѓање, а последица се на промените во развојот на структурата во ембрионалниот стадиум. Малите вреќички може да останат празни цел живот или да се претворат во цисти, исполнети со течност. Најчесто се сместени на бочната страна на вратот. Во случај да се воспалат, почнуваат вистинските проблеми. До воспаление може да дојде во било кој период од животот. Се манифестираат со отеченост и силна болка, а доаѓа и до создавање на мали дупчиња од кои излегува течност. Најголема опасност е инфекција.

Отоци на лимфните јазли – Се работи за акутно воспаление на лимфните јазли на вратот кое може да биде последица на проблеми во ждрелото, устата, ушите. Се јавуваат еден или повеќе отечени јазли на бочната страна на вратот. Болката е ограничена, но понекогаш силна. Отеченоста може да потрае многу подолго од болеста која ја предизвикала оваа појава.