ШТО Е ФЛУРОНА И КОИ СЕ СИМПТОМИТЕ? ДА, можете да добиете КОВИД-19 и грип во исто време, а еве што може да очекувате

Флурона не е нова варијанта на коронавирусот. Последна откриена варијанта на КОВИД-19 е омикрон и Светската здравствена организација од тогаш не идентификувала ниту една нова варијанта.

Кога во телото истовремено ќе се појават коронавирус и вирус на грип, се работи за болест наречена флурона. Во земјава засега нема информации за таков случај, иако во соседството веќе се забележани вакви случаи.

И грипот и КОВИД-19 се болести кои го напаѓаат респираторниот систем и имаат слични симптоми. Според Светската здравствена организација симптомите и на грип и на КОВИД-19 се различни од лице до лице, но постои група на исти симптоми кои се забележани кај заболените. Тие се:

  • Губење на сетилото за мирис и вкус
  • Покачена телесна температура
  • Кашлица
  • Отежнато дишење
  • Губење на апетит
  • Постојана болка во градниот кош

СЗО вели дека благите симптоми на флурона може да се лекуваат и дома и дека нема потреба за хоспитализација. Секако, постојат и потешки симптоми на флурона, а тие може да вклучуваат и воспаление на белите дробови, миокардитис и воспаление на срцевиот мускул.

Лекарите моментално се во паника поради појавата на вирусот на грип додека се уште трае пандемијата со КОВИД-19, а состојбата е таква да ќе мора да внимаваме и да не се заразиме со двата вируси во исто време.

“Вистина е дека можете да се заразите и со едниот и со другиот вирус во исто време, што може да биде катастрофа за имуниот систем“, вели д-р Адријан Бароуз.

Таквата ситуација може да го ослабне организмот и може да стане исклучително чувствителен на инфекции. Сами за себе КОВИД-19 и грипот може да ги нападнат белите дробови и да предизвикаат воспаление на белите дробови и сериозни респираторни проблеми, наведуваат од Центарот за контрола и превенција на болести (ЦДЦ).

Во моментов е многу рано за да се знае колку негативно влијание може да има паралелната зараза во споредба со тоа кога лицето има само една болест, но д-р Мајкл Метај, професор по медицина смета дека се поголеми шансите дека ќе се развие воспаление на белите дробови ако лицето има и грип и КОВИД-19.

КАКО ДА ЗНАЕТЕ ДАЛИ Е ВО ПРАШАЊЕ ГРИП ИЛИ КОВИД – ИЛИ ФЛУРОНА?

Симптомите на грип и КОВИД-19 се слични, тие можат да предизвикаат температура, кашлица, отежнато дишење, болки во грлото и болки во телото.

Но, за разлика од грипот, КОВИД-19 може да предизвика губење на мирис и вкус, а многумина нема ни да ги забележат симптомите. Најдобар начин за откривање на болеста е дефинитивно тестирањето.

КАКО ДА ГИ ИЗБЕГНЕТЕ ДВАТА ВИРУСА?

Носењето маска и избегнувањето гужви е најдобриот начин, експертите и понатаму го нагласуваат тоа, а во оваа ситуација тоа може да значи двојна заштита. Токму поради носењето маски дистанцирањето, земјите пријавуваат и намален број на заболени од грип, бидејќи мерките што ги користиме за да се заштитиме од КОВИД-19 помагаат и во заштитата од грип.

Според последниот достапен извештај на Институтот за јавно здравје на РСМ, во текот на 51-ва недела од 2021 година (20-26.12.2021) пријавени се 361 случај на групни пријави за заболени од грип/ заболувања слични на грип. Во текот на 51-ва извештајна недела, во вирусолошката лабораторија на ИЈЗ пристигнале 444 материјали за лабораториско тестирање на грип од кои 2 од сентинел САРИ надзорот, паралелно тестирани за грип и КОВИД-19. Притоа, детектирани се 48 (10,8%) позитивни случаи од рутинскиот надзор, од нив 46 се Influenza A/H3 и два Influenza A несубтипизирани. Пријавената инциденца е под неделната граница на сезонската активност на вирусот на грип (I=30,9/100.000), односно сѐ уште не е достигнат прагот на влез во сезоната на грип, информираат од Институтот.