Нормалната брзина на отчукувања на срцето варира од личност до личност, а нормалниот распон за возрасна личност е од 60 до 100 отчукувања во минута. Отчукувањата не се постојана вредност и се разликуваат од личност до личност заради повеќе различни фактори, некои од нив се: возраста, пушењето, кардиоваскуларните болести, високиот холестерол, дијабетесот, лековите, температурата, положбата на телото, како и активностите со кои се бават личностите.
Познато е дека на децата срцето побрзо им чука, на спортистите побавно, во однос на просечната возрасна личност. Кај децата некои варијации во брзината се нормални и не треба да се плашите ако на вашето дете срцето му чука пребрзо или преспоро. Кај здравите возрасни личности нормалниот пулс изнесува меѓу 60 и 80 отчукувања во минута, а може да дојде и до 100, што се смета за нормална горна граница. Преку 100 отчукувања во минута во состојба на мирување кај здрава возрасна личност може да биде причина за загриженост.
Зависно од возраста, просечниот број на отчукувања на срцето во состојба на мирување изнесува:
Жени 18-25 години= 74-78; 26-35 години = 73-76; 36-45 години = 74-78; 46-55 години = 74-77; 56-65 години = 74-76; 65+ години = 73-76
Мажи 18-25 години = 70-73; 26-35 години = 71-74; 36-45 години = 72-75; 46-55 години = 72-76; 56-65 години = 72-76; 65+ години = 70-73
Спортистите имаат пулс меѓу 40 и 60 отчукувања, како и трудниците на кои отчукувањата на срцето во просек им се од 60 до 70 по минута, а после физичка активност здрава возрасна личност најчесто мери пулс меѓу 120 и 150 отчукувања во минута.
Иако постои широк распон на нормалните вредности, кои се разликуваат од личност до личност, невообичаено високиот или низок број на отчукувања на срцето може да укажува на основен проблем. Проблем настанува ако отчукувањата на срцето во мирување постојано поминуваат над 100 и таа состојба се нарекува тахикардија или ако не сте активен спортист, а имате во мирување под 60 отчукувања во минута, што се нарекува брадикардија.
Се препознавате ли во овие состојби, особено ако имате и други знаци или симптоми како што се несвестица, вртоглавива или краток здив, секако, појдете на лекар.
