Воспалението на јајниците (oophoritis) претставува состојба која се развива заедно со воспаление на јајцеводите (salpingitis) и тогаш се нарекува adnexitis – болест на карлицата. Инфекцијата најчесто не настанува на самиот јајник, туку се качува од грлото на матката.
Како се манифестира
- Најчесто се јавуваат болки и чувствителност на допир во долниот дел од стомакот;
- Може да се јави болка од едната или од двете страни на стомакот;
- Болките можат да бидат континуирани или во вид на грчеви;
- Болките може да се шират низ внатрешната страна на бутовите;
- Може да се јави и зголемена температура со треска;
- Често се јавува мачнина со гадење и повраќање;
- Можна е и појава на вагинален секрет со различни особини, во зависнот од причинителот;
- Често се јавуваат болни сексуални односи (диспауренија).
Како се поставува дијагноза?
Анамнезата со клиничка слика и детален гинеколошки преглед во голема мера помага при поставувањето на дијагнозата. Пожелно е да се направат анализи на комплетна крвна слика со леукоцитна формула, седиментација и ЦРП, како и анализа на урината (да се исклучи воспаление на уринарните патишта). Секогаш е добро да се направи и тест за бременост, да се исклучи вонматерична бременост. Пожелно е да се направи и брис од вагина и цервикс со микробиолошка анализа. Ултразвук на карлицата може да биде неспецифична, но затоа лапароскопијата е високо специфична и последна алатка во поставувањето на дијагнозата.
Како се лекува:
Доколку не постои бременост, а пациентките се стабилни и со добар имун систем, лекувањето не е обавезно во болнички услови. Обично се тргнува со антибиотици во зависност од микробиолошкиот наод. Пожелно е да се ординираат и аналгетици, а во случај на компликации се оди и на оперативно лекување.
