Што кога пулсот е бавен – брадикардија

Иако забавената работа на срцето може да биде нормална за некого, како што се спортистите, за други лица тоа може да претставува опасна состојба или да предизвика непријатни симптоми

Брадикардијата е медицински назив за намалување на бројот на отчукувања на срцето кај возрасно лице на помалку од 60 отчукувања во минута. Нормалното срце чука од 60 до 100 пати во минута. Дијагнозата – брадикардија значи дека срцето чука побавно од 60 отчукувања во минута, повремено или постојано.

Иако забавената работа на срцето може да биде нормална за некого, како што се спортистите, за други лица тоа може да претставува опасна состојба или да предизвика непријатни симптоми.

Брадикардијата најчесто се манифестира без појава на други симптоми, се додека фреквенцијата не падне под 50 отчукувања на срцето во минута. Некои од симптомите на брадикардија се замор и слабост. Брадикардијата е појава која може да биде предизвикана од пореметувања на работата на срцето или болести на овој орган.

Симптоми на ниски отчукувања на срцето се:

  • Замор и слабост;
  • Вртоглавица;
  • Несвестица;
  • Краток здив;
  • Болка во градите.

Последиците од брадикардијата се разликуваат зависно од тоа колкав е бројот на отчукувања на срцето. Најчесто последица на нелекувана брадикардија се чести губења на свеста, неможност на срцето да пумпа доволно крв, како и смрт која е последица на изненаден застој на срцето.