ШТО ПРЕДВИДУВА НАУКАТА: Колку новозаболени и колку починати од новиот коронавирус ќе има во земјава во наредните седум дена

Во земјава, предвидува Европскиот центар од денес до 14. јули, бројот на новозаболени на дневно ниво и натаму ќе биде троцифрен, со минимално намалување до идниот вторник.

Институтот за глобално здравје при Медицинскиот факултет на Универзитетот во Женева и Центарот за наука на податоците во Цирих, денес ги објави своите прогнози базирани на научни алгоритми за тоа колку новозаболени со КОВИД-19 ќе има во сите земји во светот, па и во Македонија. Анализите се темелат на податоци собрани од Европскиот центар за превенција и контрола на болести (ECDC) и Универзитетот Џон Хопкинс во САД.

Европскиот центар за превенција и контрола на болести е независна агенција на Европската унија, чија мисија е зајакнување на европската одбрана против заразните болести. Основан е 2004. и се наоѓа во Солна, Шведска.

Што кажуваат прогнозите за наредните седум дена во земјава на основа на анализите од овие два извори:

Во земјава, предвидува Европскиот центар од денес до 14. јули, бројот на новозаболени на дневно ниво и натаму ќе биде троцифрен, со минимално намалување до идниот вторник. Во втората недела од месец јуни дневно ќе се евидентираат помеѓу 124 и 109 новозаразени со КОВИД-19. До средината на идната недела, вкупниот број на пациенти инфицирани со новиот коронавирус ќе изнесува 7.938.

Од друга страна, бројот на починати како последица од КОВИД-19, предвидуваат експертите од EDCD, ќе биде за нијанса помал од претходната, односно ќе се движи помеѓу 7 и 6 смртни случаи дневно. Според Центарот, до средината на идната недела вкупниот број на смртни случаи од новиот коронавирус може да изнесува 392.

Предвидувања на Европскиот центар за превенција и контрола на болести за дневниот број на новозаразени со коронавирус

Статистичките пресметки на Универзитетот Џон Хопкинс се поохрабрувачки за оваа недела. Американските статистичари предвидуваат дека во наредните седум дена во Македонија дневно ќе се заразуваат помеѓу 108 и 95 лица, односно дека кривата ќе бележи благ пад.

За разлика од своите европски колеги, тие сметаат дека дневно, во земјава од КОВИД-19 нема да починат повеќе од шест, односно пет лица. Со тоа, до вторник (14.07) вкупниот број на починати од оваа зараза ќе изнесува 387.