Стручњаците истакнуваат дека омикрон е многу заразен, а прелиминарните студии укажуваат на тоа дека главно предизвикува поблага и полесна форма на КОВИД-19. Симптомите што укажуваат на тоа дека лицето е заразено со омикрон вклучуваат температура, воспаление на грлото и чувство на гребење во грлото, силни болки во телото, ноќно потење, повраќање и губење на апетитот.
Д-р Анжелик Коци наведува дека кај пациентите заразени со омикрон не се појавуваат симптоми како што се губење на сетилото за мирис и вкус, затнат нос и многу висока телесна температура.
Познавањето на симптомите може да помогне во тоа да се открие дали лицето е заразено со делта или со омикрон варијантата. Неодамнешните сознанија откриле кои се двата најчести симптоми што ги пријавуваат пациентите заразени со омикрон.
Според последниот извештај, течење од нос и главоболката се двата главни симптоми на омикрон што пациентите најмногу ги пријавуваат.
Професорката по епидемиологија на Универзитетот во Лондон, Ирене Петерсон истакнува дека овие два симптома може да бидат знак и за некоја друга инфекција, но треба да се има предвид дека може да укажуваат и на инфекција со омикрон.
Досега се пријавени околу 20 симптоми на омикрон, а течењето од нос и главоболката се најчесто пријавуваните. Студијата открила и кои се некои други симптоми кои во поголема мера се јавуваат кај лицата заразени со омикрон. Тоа се замор, кивање и воспаление на грлото.
Лицата кои ќе ги забележат овие симптоми кај себе, им се препорачува да не ги игнорираат и да се тестираат, како и да се изолираат додека не добијат резултат од тестот за КОВИД-19.
