Што треба да сторите ако нешто ви влезе во око?

Пред да се обидете да го отстраните туѓото тело, рацете измијте ги со сапун и вода

Било да станува збор за трепка, некоја трошка која летала низ воздухот или, пак, дури и зрно песок, кога нешто ќе ни влезе во око логично е што поскоро да се обидеме да го извадиме. Најчесто инстинктивно почнуваме да ги триеме очите, но тука треба да се биде прилично внимателен. Никако немојте грубо да ги триете очите затоа што на тој начин го зголемувате ризикот од инфекции и повреди на рожницата, и, исто така, гледајте што е можно помалку да ги помрднувате очите.

Пред да се обидете да го отстраните туѓото тело, рацете измијте ги со сапун и вода. Погледнете се убаво во огледало дали можете да видите што ви влегло во окото или замолете некој тоа да го стори место вас. Потоа најдобро е окото да го измиете со чиста вода или физиолошки раствор. Доколку честичката се закачила за окото или е поголема, веднаш побарајте помош од очен лекар. Помош од лекар побарајте дури и ако успеете да ја отстраните честичката со испирање на окото, но болката и црвенилото се присутни и после тоа.