Главните карактеристики се изгубеност во времето и просторот, недостаток на фокус, збунетост и проблеми со помнењето. Се третира со лекување на состојбата или болеста чиј симптом е мозочната магла.
ШТО Е МОЗОЧНА МАГЛА?
Мозочната магла е симптом на некои состојби, а главни карактеристики се проблеми со помнењето или меморијата, лоша концентрација, неможност за нормално размислување, неможност за фокусирање. Оваа состојба може значајно да влијае на многу сфери на животот и секојдневните активности. Важно е да се знае дека мозочната магла не мора да биде трајна состојба, туку може да се појави, па исчезне откако болеста ќе се излекува.
ШТО ПРЕДИЗВИКУВА МОЗОЧНА МАГЛА?
Постојат неколку причини зошто се појавува овој симптом. Неопходно е да се открие самиот проблем, односно причината и да се третира, а потоа мозочната магла ќе исчезне со текот на времето. Значи, причините за мозочната магла се:
- Проблеми со спиењето
Добро е познато дека на возрасен човек му требаат седум до осум часа сон, а кога лицето страда од несоница, може да се појават разни проблеми во телото, меѓу кои и нарушувања на концентрацијата, но и мозочна магла.
- Хормонални промени
Промените во хормоните исто така влијаат на многу работи во однесувањето на организмот. Кога се зголемуваат нивоата на прогестерон и естроген, како на пример за време на бременоста, може да дојде до губење на краткотрајното помнење и до слаба концентрација, што е исто така форма на мозочна магла.
- Одредени медицински состојби
Медицинските состојби како што се хроничен стрес, фибромијалгија, мултипла склероза, промени во нивото на шеќерот во крвта, како и депресија, потрес на мозокот, мигрена, автоимуни болести како што се лупус, анемија, дијабетес или Алцхајмерова болест, исто така, можат да влијаат и на работата на мозокот, концентрацијата и да предизвикаат збунетост или конфузија. Освен кај состојбите, мозочната магла може да се појави и при земање одредени лекови. Во овој случај, неопходно е да се побара помош од лекар што е можно поскоро.
Мозочна магла и КОВИД-19
Можеби маглата се јавува кај некои луѓе за време или по болеста КОВИД-19. Тоа е затоа што оваа болест може да влијае на функционирањето на мозокот, односно самиот вирус може да предизвика воспаление во мозокот и да го промени начинот на функционирање на мозочните клетки, што резултира со мозочна магла која може да трае и до неколку недели по болеста, а може да биде и симптом на долготраен ковид.
КАКО СЕ ДИЈАГНОСТИЦИРА МОЗОЧНА МАГЛА?
При појавата на кои било симптоми, неопходно е да се посети лекар, особено ако симптомите нагло се влошат. За да открие дека станува збор за мозочна магла, лекарот ќе треба да направи низа тестови и да ја погледне вашата медицинска историја и да истражи какви лекови земате.
Исто така, ќе биде неопходно да се направи и крвна анализа за да се види дали има некакви воспалителни болести во телото, инфекции или проблеми со црниот дроб или бубрезите. Во некои случаи ќе биде неопходно да се посети специјалист, но и да се направи рендген, магнетна резонанца или КТ на одредени делови од телото.
КАКО СЕ ТРЕТИРА?
Самиот третман на мозочната магла зависи од тоа што ја предизвикува. Токму затоа е важно да се направат што повеќе испитувања за да се открие вистинскиот проблем. Откако ќе се открие вистинскиот извор на проблемот, тој се третира на точно дефиниран начин, а мозочната магла потоа ќе исчезне со текот на времето. Во третманот може да помогнат и вежбањето, правилната исхрана богата со витамини и минерали, намалување на стресот, доволно часови сон и вежбањето на мозокот. Додатоци како витамин Д, витамини од Б групата, омега-3 масни киселини и магнезиум исто така можат да помогнат. Најдобро е да се консултирате со лекар пред да ги земете овие додатоци.
