Причина за појава на “тесен граден кош“ или “чувство дека не може да се вдише до крај“, како што пациентите вообичаено ја опишуваат оваа состојба, која медицински е наречена диспнеа, може да е: астма, хроничен бронхитис, воспаление на бели дробови, пукање на белодробната обвивка или присуство на вода во плеврата.
Но, истовремено, причина може да бидат и кардиолошки проблеми, како што се пореметување на ритамот на срцето, слабост на срцето, воспаление на срцевиот мускул, како и анемија и заболувања на штитната жлезда.
До диспнеа може да дојде во рамките на предменструален синдром, менопауза, стрес, нервоза, пушење, како и поради промени на климатските услови, но причина може да бидат и многу сериозни состојби.
Според стручњаците, не треба да се тргнува од претпоставката дека недостатокот на воздух е последица од нервоза или стрес, туку треба да се исклучат сите други причини. Важно е на време да се направат основните лабораториски анализи, ЕКГ и снимка на белите дробови. Во зависност од наодите, лицето се упатува на соодветен специјалист.
