Шугата (scabies) е кожна болест предизвикана од ектопаразитот Acarus siro variatio hominis. Шугата е болест присутна од многу одамна и нејзината присутност се бележи во сите земји во светот.
ЗНАЦИ НА БОЛЕСТА
Водечки знак на болеста е чешање на кожата, кое е поинтензивно навечер и е многу непријатно. На самата кожа се појавува осип кој во почетокот не е карактеристичен, а се манифестира во форма на папули со големина до зрно просо, кои во средината имаат ситна краста. Кожата околу папулата обично е надразнета од чешање и видливи се лузни од гребење околу местото на јадежот. Поради интензивното чешање може да дојде до секундарна инфекција и гноење.
Типични места каде се населува паразитот се прегибните места и оние каде кожата е потенка и каде има малку лојни жлезди, бидејќи секрецијата на лој негативно влијае на животот и размножувањето на паразитот.
Кожните промени најчесто може да се воочат во просторот помеѓу прстите на рацете и стапалата, на внатрешната страна на рачниот зглоб, под пазувите, гениталната регија, внатрешната страна на бутовите, половината, а кај малите деца освен на горенаведените локализации на кожни промени, осип може да се развие и на главата, на лицето, како и на дланките и на табаните.
ДИЈАГНОЗА И ЛЕКУВАЊЕ
Дијагнозата се поставува со земање на добра анамнеза на заболениот, инспекција на промените на кожата. Диференцијалната дијагноза зависи од видовите на лезии кои се присутни. Папуловезикуларните лезии збунуваат поради сличност со уртикарија, сипаници, вирусни егзантеми. Егзематозните лезии може да имитираат атопичен дерматитис или себороичен дерматитис.
Лекувањето е потребно да се направи со примена на антискабиозни средства на начин и во дози кои ќе ги препише лекар. Сите лица кои имале близок контакт со заразеното лице, треба истовремено да се лекуваат, дури и да немаат симптоми. Облеката, долната облека и постелнината на заболениот од шуга треба да се испере на висока температура од 90 степени.
Работите кои не можат да се исперат, потребно е да се затворат во пластична ќеса и да се држат затворени најмалку 7 дена, а пожелно е 14 дена. Намештајот треба да се помине со правосмукалка и да се исчисти. Ако станува збор за дете кое оди во градинка или на училиште, потребно е да остане дома додека не заврши лекувањето.
