Одделни животни навики би можеле да помогнат да се одложи и ублажи појавата на видливите знаци на стареење на кожата на лицето. Долготрајното и често изложувае на сончевите зраци придонесува за побрзо стареење на кожата и појава на брчки. Истражувањата покажале дека секојдневна употреба на креми со заштитен фактор СПФ 15 и повеќе, го намалува ризикот од појава на хиперпигментација и изразени брчки. Доколку кожата е добро хидрирана и брчките на лицето ќе бидат помалку видливи. Освен адекватната нега, важно е да испиете барем 6 до 8 чаши вода дневно, а и повеќе, ако вежбате или ако е топло.
Избалансираната исхрана, исто така, може да придонесе за подобар изглед на кожата. Едно истражување покажало дека поголемиот внес на витамин Ц и линолеинска киселина (еден вид омега-3 масни киселини) го намалува ризикот од појава на сува кожа кај жените од 40 до 74 години.
Стресот и грижите, исто така, ги засилуваат брчките, особено на челото. Обидете се да го најдете она што ви помага да се опуштите. Некои од најчестите предлози се редовно вежбање, читање книга, здрава исхрана и сон, ароматерапија, јога, медитација, техники на длабоко дишење…
Доколку сте пушач добро би било да се обидете да ги оставите цигарите. Освен што така се зголемува ризикот од карцином на белите дробови, пушењето се смета за една од главните причини за брзо стареење. Постаро истражување од 2008 година покажало дека хемикалиите од тутунот ја намалуваат синтезата на колаген и неповолно влијаат на еластичноста на кожата што доведува до побрзо појавување на брчки.
