Поради спарината и големите жештини често се чувствуваме уморни и без сила. Помогнете си со едноставни совети: јадете лесна храна, пијте многу течности, избегнувајте тешки физички активности, но и не претерувајте со клима уредот.
- ХРАНЕТЕ СЕ ПАМЕТНО
Понекогаш е толку жешко што немаме волја да јадеме, но за енергијата да остане на потребното ниво, потребно е да се јаде барем малку на секои 4-5 часа. Најдобар избор се лубеница, целер, портокали и зелени пиперки кои се полни со вода и други хранливи состојки. Комбинирајте ги со протеини за нивото на шеќерот во организмот биде стабилно.
Избегнувајте пржена, похувана, слатка и пресолена храна, внесувајќи многу сезонско овошје и зеленчук.
- ПИЈТЕ ТЕЧНОСТИ
Сите органи и клетки во телото бараат вода за правилно да функционираат, а истражувањата покажале дека слабата дехидрација може да има негативно влијание на расположението и на извршувањето едноставни задачи. Затоа, пијте многу вода и во дневното мени вклучете течности богати со електролити.
- УМЕРЕНО СО КЛИМА УРЕДОТ
Бидете внимателни со наглото преминување од ладно на топло и обратно, и ова посебно важи за срцевите болни. Влегувањето во претерано климатизирана просторија предизвикува “стегање“ на крвните садови, а кобно може да биде и излегувањето од разладена просторија на жештина. Температурната разлика помеѓу климатизираниот и надворешниот простор не смее да биде поголема од седум степени.
- ОСВЕЖЕТЕ СЕ
Туширајте се со млака вода. Носете лесна широка светла облека од природни материјали. Ако излегувате од дома носете шапка и очила за сонце. Сепак, најпаметно е, ако не морате, да не излегувате помеѓу 10 и 17 часот.
